Курдскі рэгіянальны ўрад у Іраку: На беларуска-польскай мяжы знаходзяцца каля 8 тысяч курдаў

Прадстаўнік рэгіянальнага ўраду Курдыстану заявіў у чацвер у сталіцы рэгіёну Эрбіле, што амаль 8000 жыхароў ірацкага Курдыстану затрымаліся на беларуска-польскай мяжы і абвінаваціў Мінск у выкарыстанні курадаў у якасці казырнай карты супраць Еўропы, піша Свабода.

Пра гэта паведамляецца на інфармацыйным рэгіянальным сайце Курдыстану rudaw. net
«На гэтых межах затрымалася ад 16 000 да 17 000 чалавек, зь іх ад 7 500 да 8 000 — жыхары Курдыстану», — сказаў прадстаўнік рэгіянальнага ўраду Джоціяр Адыль.
«На жаль, Беларусь добра падрыхтаваная да таго, каб выкарыстоўваць гэтых людзей у якасці палітычнага козыру супраць Еўрапейскага Звязу. Народ Курдыстану павінен добра ведаць, што міграцыя ў гэты раён не будзе мець ніякіх наступстваў, паколькі гэта проста палітычны ціск», — дадаў Адыль.
Тысячы мігрантаў, пераважна з Блізкага Усходу і, асабліва, з Іраку, спрабуюць трапіць у краіны Еўрапейскага Звязу з Беларусі з пачатку лета. ЕЗ абвінаваціў рэжым у Мінску ў арганізацыі прытоку мігрантаў, каб пакараць Еўразвяз за ўвядзенне санкцый супраць краіны.
Адыль таксама сказаў, што ўрад працуе над паляпшэннем умоў жыцця ў курдскім рэгіёне Іраку і накіроўвае гуманітарную дапамогу тым, хто затрымаўся на мяжы з Еўразвязам.