Ізраіль абстраляў іранскія аб'екты ў Сірыі. Расія рэзка супраць

Ізраіль заяўляе, што нанёс дзясяткі ўдараў па ўрадавых аб'ектах у Сірыі, а таксама па іранскіх узброеных частках, што базуюцца на сірыйскай тэрыторыі.

Паводле ізраільскіх ваенных, такі масіраваны ўдар стаў адказам на ракетны абстрэл Ізраіля, здзейснены адным з іранскіх падраздзяленняў. Усе ракеты былі перахопленыя, ахвяр і разбурэнняў няма, паведамляе Армія абароны Ізраіля (ЦАХАЛ).
"Падчас [нашага] абстрэлу іранскіх і сірыйскіх аб'ектаў, якія выкарыстоўваюцца ў тэрарыстычных мэтах, Сірыя ўжыла свае супрацьракетныя зенітныя ўстаноўкі, нягледзячы на папярэджанні гэтага не рабіць. У выніку шэраг установак быў знішчаны", — заявілі ў сераду ў Арміі абароны Ізраіля.
Сірыйскі бок паведамляе, што яе сістэма СРА перахапіла большую частку ізраільскіх ракет над Дамаскам, аднак двое мірных грамадзян усё ж загінулі.
Па словах відавочцаў, у раёне Дамаска гучалі гучныя выбухі, у некаторых частках горада пачаліся пажары.

Расія асуджае

Паводле ізраільскіх ваенных, у тым, што адбываецца на сірыйскай зямлі, вінаваты ўрад Сірыі, які патурае акцыямі супраць Ізраіля. ЦАХАЛ настойліва раіць уладам у Дамаску пачаць стрымліваць такія акцыі.
Расія, якая з'яўляецца адным з самых блізкіх саюзнікаў прэзідэнта Сірыі Башара Асада, асудзіла ізраільскі налёт.
"Мы будзем яшчэ высвятляць абставіны, гэта вельмі ўсё няправільна. Гэта вядзе проста да нікому не патрэбнай эскалацыі напружанасці", — заявіў у сераду намеснік кіраўніка расійскага МЗС Міхаіл Багданаў.
Прэса Ізраіля падкрэслівае, што расійскія зенітна-ракетныя ўстаноўкі С-300, размешчаныя ў раёнах дыслакавання расійскіх войскаў, не пацярпелі.
З пачатку грамадзянскай вайны ў Сірыі ў 2011 годзе Ізраіль ажыццявіў сотні ракетных абстрэлаў сірыйскай тэрыторыі з мэтай спыніць нарошчванне там ваеннай прысутнасці Ірана і перашкодзіць іранскім пастаўкам зброі ваенізаванай групоўкі "Хезбала" ў суседнім Ліване.
bbc.com