Дасье ў карыкатурах: Выбары падчас чумы
Насуперак пандэміі Францыя праводзіць выбары. У нядзелю, 15 сакавіка, праходзіць першы тур муніцыпальных выбараў ва ўсіх рэгіёнах. Вынікі галасавання будуць вельмі важнымі для далейшага лёсу краіны.
Атмасфера, у якой праходзяць выбары, вельмі незвычайная. Напярэдадні кіраўнік дэпартаменту здароўя заявіў, што эпідэмія каронавіруса ў Францыі перайшла на трэцюю стадыю. Па апошніх звестках, колькасць тых, хто захварэў, складае 4499 чалавек, памёр 91 чалавек. За 72 гадзіны, якія папярэднічалі дню галасавання, колькасць хворых вырасла ўдвая. Паводле апошніх апытанняў, трывогу з-за віруса адчуваюць амаль палова жыхароў Францыі. Многія штурмуюць крамы для запасаў харчавання. Сітуацыю ў краіне напярэдадні выбараў перадае карыкатура выдання Rue 89. Муж і жонка не супраць прагаласаваць, але не ведаюць, як знайсці выхад з дому, які пераўтвораны ў склад прадуктаў.
Пра рашэнне правесці галасаванне паведаміў прэзідэнт краіны Эмманюэль Макрон падчас тэлевізійнага звароту да нацыі. Для правядзення галасавання ўрадам прадугледжаны дадатковыя меры бяспекі. Так, французы павінны прыходзіць на выбарчыя ўчасткі са сваімі асадкамі, на кожным участку ўстаноўлены рэзервуары з антысептычным гелем. Акрамя таго, на ўчасткі можна з'явіцца ў масцы, аднак пры рэгістрацыі яе прыйдзецца зняць. У якасці каментара французская секцыя Sputnik прапанавала сваю іранічную графічную версію тэхнікі бяспекі ў кабінках для галасавання.
Напярэдадні ўспышкі пандэміі падавалася, што выбары засведчаць катастрофу прэзідэнцкай партыі Рэспубліка на маршы (LREM). Аднак крызіс у галіне аховы здароўя крыху перетасаваў карты. З-за каронавіруса прагназуецца рэкордна нізкая яўка, што патэнцыйна можа дапамагчы кандыдатам Макрона. Амаль тры з дзесяці выбаршчыкаў (28 %) плануюць не галасаваць, у тым ліку амаль 36% жыхароў парыжскай агламерацыі. Мяркуюць, поспех Макрона можа дазволіць яму думаць аб пераабранні на пасаду прэзідэнта. Аднак пакуль незразумела, як грамадства даруе прэзідэнту вельмі непапулярную пенсійную рэформу. На малюнку выдання Blague et Dissans доктар паведамляе, што Мар'яна (сімвал французскай рэспублікі) падхапіла больш жудасную хваробу, чым каронавірус — аказалася ахвярай пенсіённай рэформы.
Яшчэ адна інтрыга выбараў — ці зломіць эпідэмія дынаміку папулярнасці зялёных? Зялёныя, якія доўгі час з'яўляліся маргінальнай сілай у французскай палітыцы, могуць сабраць добры ўраджай галасоў. Гэтаму спрыяюць моцныя вынікі леташніх еўрапейскіх выбараў і новая хваля экалагічнай актыўнасці сярод французскай моладзі. Больш за тое, у выпадку поспеху эколагі могуць стаць самай моцнай партыяй на левым флангу. Гэты парадокс канстатуюць героі малюнка мастака выдання l'Opinion. Яны — лідары камуністаў і сацыялістаў, занадта позна заўважылі, што ў іх пад носам вырасла нешта велізарнае зялёнае.
Вялікая цікавасць да шанцаў партыі Нацыянальнае аб'яднанне (RN) пад кіраўніцтвам Марын Ле Пен. Доўгі час спробы правых папулістаў займець пасады мэраў блакаваліся сістэмай падвойнага галасавання, калі ў другім туры партыі аб'ядноўваюцца. У нашым выпадку гэта былі левыя і правыя партыі, якія бачылі ў Ле Пен пагрозу дэмакратыі. Але, здаецца, часы мяняюцца. Антыімігранцкая рыторыка, як мяркуюць, дазволіць RN упершыню захапіць мэрыю горада з насельніцтвам звыш 100 000 чалавек. Гэта паўднёвы Перпіньян (Perpignan), дзе да ўлады ірвецца правадыр мясцовых нацыяналістаў Луі Алліот. Прэса выяўляе яго як новую зорку правай сцэны. Малюнак выдання Riposte.
Застаецца дадаць, што другі тур выбараў адбудзецца 22 сакавіка. І з улікам наступу заразы іх фармат і развязка ўвогуле непрадказальныя.