У Беларусь прыедуць і выпушчаныя з турмаў РФ злачынцы-вагнераўцы? Да нас прыедзе да 10 тысяч наймітаў!
Колькі ўсё ж расійскіх наймітаў з ПВК «Вагнера» збіраецца прыехаць у Беларусь? Учора з’явілася лічба ў 10 тысяч.
Расійскія СМІ пішуць, што ПВК "Вагнер" расфармаваная — такую пастанову прыняў асабіста Пуцін. Як паведамляе выданне “Важныя гісторыі”, ПВК адпусціла ўсіх зняволеных, завербаваных у расійскіх турмах. Цяпер яны знаходзяцца ў гасцініцах Краснадарскага краю і чакаюць афармлення дакументаў аб памілаванні, пасля чаго змогуць вярнуцца дадому. Пры жаданні яны змогуць падоўжыць кантракт з ПВК “Вагнер”, каб паехаць у Беларусь або Афрыку.
Блізкі да ПВК Вагнера тэлеграм-канал «Разгрузка Вагнера» апублікаваў заяву сябра «Рады камандзіраў» кампаніі з пазыўным Маркс, які сцвярджае, што ў Беларусь прыедуць да 10 тысяч наймітаў.
Гэтую лічбу ён назваў, каментуючы выказванне дэпутата Дзярждумы Уладзіміра Шаманава, які заявіў, што 32—33 тысячы наймітаў ПВК «Вагнера» заключылі кантракты з Мінабароны, а яшчэ ад сямі да дзесяці тысяч знаходзяцца з Яўгенам Прыгожыным, піша «Медуза».
«Маркс» сцвярджае, што лічба ў 33 тысяч не адпавядае рэчаіснасці. Паводле яго слоў, усяго за час вайны ва Украіне ў ПВК Вагнера ўдзельнічалі 78 тысяч байцоў, з якіх 49 тысяч — зняволеныя. На момант захопу Бахмута забітымі былі 22 тысячы наймітаў, яшчэ 40 тысяч была параненыя.
«Жывымі і здаровымі 25 тысяч, плюс параненыя, якія знаходзяцца на лячэнні. З іх убыло і меншае ў Беларусь да 10 тысяч. Ужо сышлі ў адпачынак 15 тысяч. Якім чынам сфармаваліся 33 тысячы тых, хто пайшоў да вайскоўцаў, мне пакуль невядома», — гаворыцца ў заяве аднаго з камандзіраў наймітаў.
18 ліпеня маніторынгавы праект «Беларускі Гаюн» пісаў, што ў Беларусі знаходзяцца ўжо 2000-2500 наймітаў ПВК Вагнера. Паводле яго звестак, з 11 ліпеня ў Беларусь прыбыло як мінімум пяць калон расийских наймітаў, гэта значыць не менш за 382–400 машын.
Глядзіце таксама
Днём 19 ліпеня звязаныя з ПВК “Вагнера” тэлеграм-каналы апублікавалі відэа, на якім заснавальнік вайсковай кампаніі Яўген Прыгожын выступае перад наймітамі, якія прыехалі ў Беларусь. Відэа было знятае пасля наступлення цемры, на ім можна было разглядзець толькі нешта падобнае на профіль Прыгожына. Заснавальнік ПВК «Вагнер» павітаў сваіх байцоў у Беларусі і сказаў ім, што яны пакуль не будуць браць удзелу ў вайне ва Украіне. Ён назваў тое, што адбываецца цяпер на фронце, «ганьбай».
«Мы годна ваявалі, — кажа мужчына ў цемры. — Вы зрабілі для Расіі вельмі шмат. Цяпер тое, што адбываецца на фронце, гэта ганьба, у якой нам не трэба ўдзельнічаць».
Затым Прыгожын просіць сваіх людзей паводзіць сябе добра ў адносінах да мясцовых жыхароў і загадвае ім навучыць беларускае войска, таксама сабрацца з сіламі для «новага падарожжа ў Афрыку».
«І, магчыма, вернемся на СВА ў той момант, калі будзем упэўненыя, што нас не прымусяць пасароміць саміх сябе і наш вопыт», — сказаў Прыгожын (вайну супраць Украіны ў Расіі называюць «спецыяльнай ваеннай аперацыяй»).
А яшчэ ён сказаў сваім наймітам, што яны зробяць беларускае войска «другім войскам у свеце».
«І дачакацца таго моманту, калі мы зможам праявіць сябе па поўнай праграме. Таму прынята рашэнне, што мы будзем знаходзіцца тут, у Беларусі, нейкі час».
Апублікаванае відэа стала першым публічным з'яўленнем Прыгожына пасля бунту. Верагодна, відэа знятае ў лагеры пад Асіповічамі Магілёўскай вобласці.