Еўрадэпутат: Тыя, каго сёння рэпрэсуюць, у будучыні стануць героямі гэтай барацьбы
Радаслаў Сікорскі упэўнены: Беларусь стане вольным і паважаным членам еўрапейскай сям'і.
Фота Bild
Экс-кіраўнік МЗС Польшчы Радаслаў Сікорскі ў інтэрв'ю DW назваў беларускае правасуддзе фарсам і выказаўся аб закрытым судзе над Сяргеем Ціханоўскім.
— Адзінае злачынства Ціханоўскага толькі ў тым, што ён
спрабаваў паводзіць сябе як грамадзянін нармальнай краіны, у якога ёсць
палітычныя амбіцыі. Яго злачынства складалася ў спробе быць абраным на пасаду
прэзідэнта Беларусі. Вось чаму беларускі дыктатар наважыў выкарыстоўваць яго
для застрашвання астатняга грамадства.
На думку еўрадэпутата, такія меры (суд у СІЗА ў закрытым
рэжыме) прымаюцца, паколькі Лукашэнка хоча быць упэўнены, што
суд падпарадкуецца і вынесе менавіта тое рашэнне, якое ён загадае.
Радаслаў Сікорскі патлумачыў, чаму вырашыў узяць шэфства над
Сяргеем Ціханоўскім:
— Я ўдзельнік руху «Салідарнасць». Яшчэ ў 1981
годзе, калі ў Польшчы было ўведзена ваеннае становішча, здавалася, што рэжым
аднавіў кантроль, і ўся надзея страчана. Тым не менш праз восем гадоў Польшча
стала свабоднай краінай, дэмакратычнай, краінай, якая ідзе шляхам далучэння да
ЕС і іншых заходніх інстытутаў.
Зараз цёмная фаза ў гісторыі Беларусі, але гэта момант
абуджэння беларускага народа як праеўрапейскага, які патрабуе адпаведных
стандартаў у грамадскім жыцці. Патрабуе дэмакратыі і больш цесных стасункаў з
Еўрапейскім Саюзам.
І тыя, хто сёння падвяргаецца рэпрэсіям, у будучыні стануць
героямі гэтай барацьбы. Я ў гэтым упэўнены.
Таму я звяртаюся да Сяргея Ціханоўскага, яго паплечнікаў і
сем'яў усіх рэпрэсаваных: «Не губляйце надзеі! Рана ці позна любая
дыктатура падзе. Калі-небудзь Беларусь стане вольным і паважаным членам
еўрапейскай сям'і. Жыве Беларусь!»
Паводле «Салідарнасці».