957-мы дзень поўнамаштабнай вайны Расіі супраць Украіны: расійцы захапілі Краснагораўку; у Феадосіі гарыць нафтабаза

Працягваем збіраць звесткі з украінскага фронту і пра баявыя дзеянні на тэрыторыі РФ.

***

Выведка Вялікабрытаніі ў верасні 2024 года зафіксавала новы рэкорд сярэднесутачных страт расійскіх акупацыйных войскаў ва Украіне за ўвесь час поўнамаштабнага ўварвання. Папярэдні рэкорд быў зафіксаваны ў траўні, гаворыцца ў выведвальным аглядзе брытанскага Міністэрства абароны.

За верасень гэтага года сярэднясутачныя страты акупацыйнай арміі РФ склалі 1271 чалавек (забітымі і параненымі). Папярэдні рэкорд быў зафіксаваны ў траўні 2024 года, калі сярэднясутачныя страты РФ складалі 1262 (забітымі і параненымі).

Усяго за ўвесь час поўнамаштабнай вайны Расія страціла больш за 648 тысяч вайскоўцаў. Брытанская выведка спасылаецца на звесткі ўкраінскага Генеральнага штаба.

У ведамстве адзначылі, што рост узроўню страт амаль напэўна звязаны з пашырэннем зоны баявых дзеянняў за кошт Харкаўскай і Курскай ваенных аперацый, а таксама павелічэннем інтэнсіўнасці баявых дзеянняў уздоўж лініі фронту.

«Расійскія войскі, хутчэй за ўсё, працягваюць спрабаваць расцягнуць украінскія сілы, выкарыстоўваючы масавасць для пераадолення абарончых пазіцый і дасягнення тактычных пераваг», — гаворыцца ў аглядзе.

Таксама выведка прагназуе, што сярэднесутачныя страты РФ будуць заставацца на ўзроўні тысячы чалавек, нягледзячы на набліжэнне зімы.

«На сённяшні дзень зімовыя ўмовы не прывялі да скарачэння наступальных аперацый або змяншэння страт праз тое, што Расія выкарыстоўвае пяхотную тактыку і не вядзе манеўранай вайны, якая патрабуе лепшых умоў», — рэзюмавалі ў брытанскай выведцы.

***

Аналітыкі праекта «Deepstate» паведамілі, што расійцы завяршылі поўную акупацыю Краснагораўкі Данецкай вобласці.

«Вораг завяршыў поўную акупацыю Краснагораўкі, а таксама прасунуўся ў Цукурыне, каля Гарняка і Любімаўкі».

***

На думку спецыялістаў амерыканскага «Інстытута вывучэння вайны» (ISW), гатоўнасць расійскага ваеннага камандавання дасягаць абмежаваных тактычных поспехаў у абмен на значныя страты бронетэхнікі будзе станавіцца ўсё даражэй з-за абмежаваных запасаў узбраення і тэхнікі савецкіх часоў.

Паводле паведамленняў, расійскія войскі страцілі не менш за 5 дывізій бронетэхнікі і танкаў у Пакроўскім раёне з пачатку наступальнай аперацыі па захопе Аўдзееўкі ў кастрычніку 2023 года і падчас узмоцненых расійскіх наступальных аперацый на захадзе Данецкай вобласці летам 2024 года.

Аналітыкі адзначаюць, што карыстальнік сеткі «X» (раней — «Twitter»), які адсочвае візуальна пацверджаныя страты расійскай тэхнікі ва Украіне, заявіў, што расійскія войскі страцілі 1 830 адзінак цяжкай тэхнікі ў Пакроўскім раёне з 9 кастрычніка 2023 года.

У справаздачы нагадваюць: расійскія войскі пачалі інтэнсіўную 4-месячную наступальную аперацыю па захопе Аўдзееўкі ў кастрычніку 2023 года, а пазней працягнулі наступ на захад ад Аўдзееўкі і на захад і паўднёвы захад ад Данецка вясной і летам 2024 года, і даныя карыстальніка адлюстроўваюць страты расійскай тэхнікі, назапашаныя падчас гэтых наступальных дзеянняў.

«Ацэнка карыстальніка "X", заснаваная на візуальна пацверджаных стратах тэхнікі, верагодна, з'яўляецца папярэдняй, паколькі не ўсе страты расійскай тэхнікі візуальна зафіксаваныя. Фактычная колькасць страт расійскай тэхнікі ў раёне Пакроўска, імаверна, вышэйшая, чым паведамляецца».

Эксперты мяркуюць, што расійскае ваеннае камандаванне не жадае або не можа прызнаць бягучыя маштабы і тэмпы страт тэхнікі ў бліжэйшыя месяцы і гады, улічваючы абмежаванні ў абаронна-прамысловай вытворчасці, запасах тэхнікі савецкіх часоў і няздольнасць расійскіх вайскоўцаў дасягнуць аператыўна значнага тэрытарыяльнага прасоўвання з дапамогай механізаванага манеўру.

***

За мінулыя суткі на 10 кірунках фронту адбылося 141 баявое сутыкненне. Больш актыўна за ўсё вораг наступаў на Пакроўскім і Курахоўскім кірунках, дзе ў цэлым абаронцыУкраіны адбілі 39 нападаў.

«Што датычна паветраных нападаў, то ў ноч на 7 кастрычніка (з 20.00 06.10 па 8.30.00 07.10) праціўнік нанёс удар па Украіне балістычнай ракетай "Іскандэр-М", кіраванай авіяцыйнай ракетай Х-59, ракетай неўстаноўленага тыпу з Курскай і Белгародскай абласцей РФ, а таксама ўдарнымі БПЛА (раёны пускаў: Арол, Прыморска-Ахтарск, Курск, Ейск).

Каля 08.20 вораг нанёс удар па трох аэрабалістычнымі ракетамі Х-47 М2 "Кінжал" з трох самалётаў МіГ-31 з паветранай прасторы Тамбоўскай вобласці (аэрадром вылету — "Саваслейка")», — гаворыцца ў паведамленнях Сіл абароны Украіны.

У выніку супрацьпаветранага бою пацверджана збіццё двух аэробаллистических ракет Х - 47 М2 «Кінжал» у Кіеўскай вобласці і 32 варожых ударных БпЛА ў Мікалаеўскай, Кіеўскай, Днепрапятроўскай, Сумскай, Чарнігаўскай, Палтаўскай і Харкаўскай абласцях.

Зафіксавана некалькі пападанняў варожых ударных дронаў у прыфрантавой Харкаўскай вобласці. Адзін з трох «Кінжалаў» папаў у раён аэрадрома «Стараканстанцінаў» у Хмяльніцкай вобласці.

Тым часам Сілы абароны Украіны працягваюць наносіць страты Расіі — толькі за мінулыя суткі абясшкодзілі 1 160 захопнікаў, 14 танкаў і 64 артылерыйскія сістэмы. Агульныя баявыя страты расійцаў з 24.02.22 па 07.10.24 арыенціровачна склалі:

• асабістага саставу — каля 661 630 (+1 160) чалавек;
• танкаў — 8 933 (+14) адз.;
• баявых браніраваных машын — 17 710 (+31) адз.;
• артылерыйскіх сістэм — 19 156 (+64) адз.;
• РСЗА — 1 223 (+7) адз.;
• сродкаў СПА — 972 (+2) адз.;
• самалётаў — 368 (+0) адз.;
• верталётаў — 328 (+0) адз.;
• БПЛА аператыўна-тактычнага ўзроўню — 16 643 (+65) адз.;
• крылатых ракет — 2 615 (+2) адз.;
• караблёў / катэраў — 28 (+0) адз.;
• падводных лодак — 1 (+0) адз.;
• аўтамабільнай тэхнікі і аўтацыстэрнаў — 26 102 (+96) адз.;
• спецыяльнай тэхнікі — 3 364 (+1) адз.

***

Акупанты зноў атакавалі сталіцу Украіны беспілотнікамі — трывога ў Кіеве гучала больш за дзве гадзіны, усе варожыя цэлі ўдалося знішчыць, паведаміў начальнік КГВА Сяргей Папко.

«Сіламі і сродкамі СПА ў паветранай прасторы вакол Кіева было выяўлена прыкладна паўтара дзясятка расійскіх дронаў. Усе варожыя БПЛА, якія пагражалі сталіцы, былі абясшкоджаныя (дакладная колькасць і тып дронаў апублікуюць паветраныя сілы)».

Паводле слоў Папко, інфармацыя пра разбурэнні або пацярпелых не паступала.

Начальнік КГГА нагадаў, што гэта была чацвёртая паветраная атака на Кіеў з пачатку кастрычніка. Дроны на ўкраінскую сталіцу заходзілі хвалямі і з розных кірункаў. Паветраную трывогу на працягу ночы аб'яўлялі тройчы, сумарна яна доўжылася больш за 2 гадзіны.

***

Расійскія акупанты ўначы 7 кастрычніка нанеслі ракетны ўдар па горадзе Паўлаград Днепрапятроўскай вобласці, у выніку чаго ўзнік пажар на прадпрыемстве, паведаміў кіраўнік рэгіёна Сяргей Лысак у Telegram.

«Пашкоджана прадпрыемства. Узнік пажар, які ратавальнікі лакалізавалі».

Паводле слоў Лысака, загінулых і пацярпелых няма.

Па Нікапалі акупанты ўдарылі з цяжкай артылерыі, абышлося таксама без пацярпелых.

***

Генеральны штаб УСУ паведаміў, што сілы абароны ў ноч на 7 кастрычніка паспяхова ўдарылі па марскім нафтавым тэрмінале захопнікаў у горадзе Феадосія часова акупаванага Крыма.

«Сёння ноччу нанесены паспяховы ўдар па марскім нафтавым тэрмінале праціўніка, што ў часова акупаванай Феадосіі АР Крым. У раёне аб'екта зафіксавана ўзгаранне. Наступствы паражэння ўдакладняюцца».

Украінскія вайскоўцы нагадалі, што Феадасійскі тэрмінал — найбуйнейшы ў Крыме па аб'ёмах перавалкі нафтапрадуктаў, якія выкарыстоўваліся, у тым ліку і для забеспячэння патрэб акупацыйнай арміі РФ.

Задача выканана падраздзяленнямі ракетных войскаў Узброеных сіл Украіны ва ўзаемадзеянні з іншымі складнікамі Сіл абароны.

Як паведамляюць расійскія прапагандысцкія ТГ-каналы, у Феадосіі ўведзены рэжым тэхнагеннай надзвычайнай сітуацыі муніцыпальнага характару. Прадстаўнікі акупантаў традыцыйна запэўніваюць, што нібыта ахвяр і пацярпелых няма.

***

Расійскія акупанты атакавалі беспілотнікамі прыватны сектар у Сумах, у выніку чаго 4 чалавекі, сярод якіх дзіця, атрымалі траўмы, успыхнуў пажар і зафіксаваныя разбурэнні.

«Напярэдадні акупанты здзейснілі атаку БПЛА па прыватным жылым сектары горада, у выніку чаго значным разбурэнням падвергнуўся аднапавярховы жылы дом. Узнік пажар», — паведамляюць у ДСНС Украіны. Узгаранне аператыўна патушылі.

Акрамя таго, ратавальнікі эвакуявалі пажылую жанчыну з суседняга памяшкання, дзверы якога дэфармавала выбухной хваляй.

«Паводле папярэдніх даных, траўмы атрымалі 4 чалавекі, сярод іх адно дзіця. Пашкоджаны 9 дамоў, 2 гаражы, 3 аўтамабілі», – паведамілі ў ДСНС.

***

7 кастрычніка армія Расіі нанесла чарговы авіяўдар па горадзе Канстанцінаўка. Папярэдне, вораг атакаваў населены пункт «КАБ-250» з УМПК.

Паведамляецца, што ў зоне паражэння аказалася тэрыторыя прыватнага прадпрыемства, дзе атрымалі цялесныя пашкоджанні чацвёра рабочых — двое мужчынаў 41 і 55 гадоў, а таксама 55 і 61-гадовая жанчыны.

З мінна-выбуховымі траўмамі, аскепкавымі раненнямі і кантузіямі пацярпелых даставілі ў медыцынскую ўстанову, дзе ім была аказана кваліфікаваная дапамога. 

Выбуховай хваляй таксама пашкоджаны фасады жылых дамоў і аўтатранспарт.

***

Усерасійская дзяржаўная тэлевізійная і радыёвяшчальная кампанія (ВГТРК) заяўляе пра «беспрэцэдэнтную хакерскую атаку» на свае онлайн-сэрвісы: не працуе онлайн-вяшчанне і ўнутраныя сэрвісы, няма інтэрнэту і тэлефаніі.

Пра гэта піша расійскае выданне «Медуза».

«Гэта надоўга. Чуў, што сцерлі ўсё з сервераў, уключаючы рэзервовыя копіі. Яны працуюць у аўрале з 06:00 раніцы. Праблема, як я зразумеў, вельмі сур'ёзная, і аднаўленне зойме шмат часу», — сказаў суразмоўца выдання.

Іншы расійскі журналіст паведаміў, што ўвесь навінавы комплекс «России 1» з 05:00 раніцы не працуе. «Паляцелі» цэнтральны кантролер і ўсе серверы.

У карыстальнікаў у РФ не адкрываюцца онлайн-трансляцыі тэлеканалаў «Россия 1» і «Россия 24», у той жа час лічбавае тэлевяшчанне працуе без перабояў.

Тэхнічныя непаладкі ўзніклі і на сайтах рэгіянальных тэлекампаній, якія адносяцца да ВГТРК.

ВГТРК пацвердзіла «беспрэцэдэнтную хакерскую атаку» на свае онлайн-сэрвісы. Пры гэтым у прэс-службе сцвярджаюць, што працы медыяхолдынга «не нанесеная істотная шкода» і «ўсё працуе ў штатным рэжыме».

***

На працягу ночы і раніцы 7 кастрычніка ў паветраную прастору Беларусі заляцелі прынамсі чатыры дроны-камікадзэ тыпу «Шахед», паведамляе аналітычны праект «Беларускі Гаюн» са спасылкай на ўкраінскія маніторынгавыя рэсурсы

Аналітыкі пішуць, што за мінулую ноч і раніцу не менш за чатыры дроны-камікадзэ тыпу «Шахед» заляцелі ў паветраную прастору Беларусі. Першы выпадак быў зафіксаваны ў 23:27, калі дрон перасёк мяжу з Чарнігаўскай вобласцю Украіны ў кірунку горада Хойнікі. 

«Далей "Шахеды" заходзілі ў Беларусь у 00:40, 04:06 і 08:35. Вядома, што дрон, які заляцеў у Беларусь у раёне Лоева а 04:06, пакруціўся ў паветранай прасторы Беларусі блізу 40 хвілін і вярнуўся назад ва Украіну, таксама пацверджанае вяртанне ва Украіну і апошняга "Шахеда", які заляцеў блізу 08:35».