Топ-10 фільмаў пра эканамічны крызіс

Чалавецтва зноў уваходзіць у бурлівы перыяд нявызначанага эканамічнага стану. Паўсюдныя мыты, якія ўводзяцца тут і там, фінансавыя войны і хаатычныя рашэньні – балюча адабьюцца на людзях. Такія зьявы былі заўжды, а значыцца і стужкі пра гэта здымалі спраўна. Мы падрыхтавалі аўтарскі сьпіс лепшых фільмаў пра эканамічны крызіс і дэпрэсію. Прыемнага прагляду!

Акрамя гэтай аўтарскай падборкі, іншыя сьпісы фільмаў глядзіце тут.

Нумар 10. Гульня на зьніжэньне (The Big Short). 2015

Заснаваная на кнізе Майкла Льюіса, стужка распавядае пра тое, як некалькі трэйдараў і спецыялізаваных інвестыцыйных фондаў (хэдж-фондаў) нажылі багацьце, бо заўважылі, што спад рынку жыльля прывядзе да краху аблігацый, створаных з іпатэчных крэдытаў. Тэрміналёгія незразумела-сухая, адначасова з тым махінацыі неверагодна заблытаныя.

Галоўны тэзіс гісторыі, экранізаванай рэжысэрам Адамам МакКеем заключаецца ў тым, што, калі банкаўская справа стала галоўнай галіной у Злучаных Штатах Амерыкі, банкіры наўмысна прыдумалі фінансавыя інструмэнты, галоўнай функцыяй якіх была дапамога багатым стаць багацейшымі і выцягнуць усё са звычайных людзей. Гэта стала прычынай сусьветнага фінансавага крызісу 2007-2008 гадоў.

Нумар 9. Чараўнік хлусьні (The Wizard of Lies). 2017

Фільм Бары Левінсана з бездакорным Робэртам Дэ Ніра ў галоўнай ролі апавядае рэальную гісторыю чалавека, які пабудаваў фінансавую піраміду, якой яшчэ не бачыў сьвет. Ён скраў каля 65 мільярдаў даляраў у даверлівых амэрыканцаў, якія дабраахвотна неслі грошы ў яго праэкт, ад пачатку сьвядома пабудаваны ў якасьці бурбалкі. Хтосьці ўмее інвеставаць, хтосьці гандляваць акцыямі, нехта трымае грошы ў банку, а герой гэтага фільма ўмее зарабляць пазначаным чынам.

Цікава, што негледзячы на шматкроць паўтораная перасьцярогі пра махляроў, людзі што ў ЗША, што ў нас, у Беларусі, працягвуюць верыць «экспертам на словах», і аддаваць свае сродкі. Амаль увесь фільм «Чараўнік хлусьні» разгортваецца пасьля арышту героя Робэрта Дэ Ніра ў 2008 годзе

Нумар 8. Працоўная паненка (Working Girl). 1988

У адрозьненьні ад папярэдніх драмаў, гэты фільм – камедыйны. Майк Нікалс паставіў стужку з Мэлані Грыфіт, Харысанам Фордам і Сігурні Ўівэр, якія паказваюць нам цікавы эпізод з працы адной вялікай кампаніі. Звычайная сакратарка, якая марыць пра тое, каб заняць сваё месца ў сьвеце буйнога бізнэсу ў Нью-Ёрку.

Аднойчы яе бос ламае нагу падчас катаньня на лыжах. Сакратарка атрымлівае звышнечаканую магчымасьць заняць яе месца падчас лекаваньня кіраўніцы. Выдаючы сябе за свайго боса, сакратарка праводзіць буйную ўгоду з інвестыцыйным брокерам. Сітуацыя ўскладняецца, калі вяртаецца яе бос. Як жа складзецца мазаіка працоўных адносінаў? Глядзіце і ўсьміхайцеся, гэта вельмі карысна.

Нумар 7. Зьмяніцца месцамі (Trading Places). 1983

У стужцы Джона Лэндзіса два браты, якія кіруюць брокерскай кампаніяй, паспрачаліся наконт таго, спадчыннасьць ці асяроддзе адказваюць за характар ​​чалавека. Браты ладзяць «навуковы эксперымент», у якім бяруць афэрыста з вуліцы і свайго элітарнага выканаўчага дырэктара, і зьмяняюць іх месцамі.

Дырэктар у поўным прыгнёце ў жыцьці на вуліцы, а афэрыст квітнее як ​​таварны брокер. Камедыя выходзіць на новы ўзровень пасьля таго, як два чалавекі, якіх прымусілі заняць месца іншага – вырашаюць расправіцца і з уласьнікамі кампаніі.

Нумар 6. Уол-Стрыт (Wall Street). 1987

Клясычная стужка Олівэра Стоўна, якая распавядае пра дзейнасьць самай знакамітай у фінансавым сьвеце вуліцы. Фільм першапачаткова меўся называцца «Прагнасьць», што ўжо цалкам ёміста апісвае нам сутнасьць. Гледачы знаёмяцца з брокерам, які трапляе ў гэтую абмежаваную касту супрацоўнікаў Уол-Стрыт.

Ён спрабуе сябе ў працы, спробы атрымліваюцца пасьпяховымі, а пасьля галоўны герой знаёміцца з больш дасьведчаным гульцом на гэтым рынку. І той пачынае вучыць героя быць па-сапраўднаму прагным да ўсяго, атрымліваць прыбытак, перамалваючы іншых, нават сяброў. Ці жадалі вы калі-небудзь пабываць на біржы? Уключайце фільм!

Нумар 5. Дваццатыя, якія рыкаюць (The Roaring Twenties). 1939

Гэты фільм, зьняты знакамітым Раўлем Уолшам, зьяўляецца адлюстраваньнем бурных 1920-х гадоў. Гледачы трапяць у бурлівую эпоху дэкадансу і яе няўмольнае падзеньне ў роспач Вялікай дэпрэсіі. Хамфры Богарт выступае тут у вобразе бязьлітаснага гангстэра.

Вам цікава чым і як жылі людзі сто гадоў таму? Рэтраспэктыва вышэйшага ўзроўню – вашай увазе. Фільм распавядае пра жыцьцё трох ветэранаў Першай сусьветнай вайны ў выкананьні Джэймса Кэгні, Джэфры Ліна і Богарта, калі яны спрабуюць знайсьці ўласны шлях у мірным грамадзтве.

Уолш драматычна паказвае ўзьлёт і падзеньне яго герояў. Кожны па-свойму, кожны ў свой час.

Нумар 4. Эмігранты (Utvandrarna). 1971

Швэдзкі фільм рэжысэра Яна Труэля. За ролю ў стужцы Ліў Ульман атрымала ўзнагароду Залаты Глёбус. Другой зоркай карціны стаў Макс фон Сюдаў. Эміграцыя справа доўгая, таму і фільм у аўтараў артымаўся надзвычай працяглым – больш за тры гадзіны. Але яны безумоўна вартыя таго, каб патраціць на іх ваш вечар. Уявіце халодную, вельмі халодную Швэцыю сярэдзіны ХІХ стагодзьдзя. У бязьлюдным месцы на ферме працуе сямейная пара.

Іх стан пагаршаецца, як і жыцьцё падобных сем’яў навакол, і яны вырашаюць прадаць усё і выправіцца ў Амерыку на караблі. Бясконцая дарога па моры і па сушы прыводзіць эмігрантаў у невядомую ім Мінесоту, якая ўяўляецца ці не раем на зямлі. Іх чакае… гэта вы даведаецеся, калі ўключыце гэты выдатны фільм.

Нумар 3. Гронкі гневу (The Grapes of Wrath). 1940

Экранізацыя галоўнага рамана Джона Стэйнбэка стала кінематаграфічным трыюмфам. Фільм адлюстроўвае суровыя рэаліі амэрыканскай Вялікай дэпрэсіі з непахіснай сумленнасьцю і глыбокім суперажываньнем.

Рэжысэр Джон Форд, вядомы сваёй здольнасьцю перавесьці на экран эпічны размах чалавечай барацьбы, стварыў фільм, які адначасова зьяўляецца сацыяльным камэнтаром да падзеяў навакол, а таксама глыбока кранальнай чалавечай драмай.

Гледачы трапяць на пыльныя, бязлюдныя пэйзажы, у якіх адбываецца пакутлівае падарожжа сям'і ў пошуках лепшай долі. Стужка, як і кніга, абавязкова закрануць вашае сэрца. Сапраўдны рэалізм даўняй Амэрыкі.

Нумар 2. Недатыкальныя (The Untouchables). 1987

Гэта гісторыя пра герояў і злодзеяў, пра непахісную сілу закона супраць карупцыйнай прыроды чалавека. Дзеяньне стужкі Браяна дэ Пальма адбываецца на фоне Чыкага эпохі Сухага закону і фінансавага крызісу. Фільм цалкам напоўнены подыхам і гвалтам свайго часу.

Акторскі склад не пакіне вас у роздуме, ці глядзець гэтае кіно. Кевін Костнэр у ролі дэтэктыва, Шон Конэры ў ролі старога паліцэйскага і вялікі Робэрта Дэ Ніра ў ролі Аль Капонэ – разам з музыкай Эніа Марыконэ – геніяльнасьць агульных намаганьняў гарантаваная.

Адна з самых легендарных перастрэлак у гісторыі кінематографу была зьнятая акурат Браянам дэ Пальма. Гангстэры, бурбон, чорная каса і паліцэйскія, якія мараць зрабіць сьвет крыху сьвятлей. Ці засталіся недатыкальныя вакол? Ці кожны мусіць азірацца і правяраць ежу на атруту?

Нумар 1. Воўк з Уол-Стрыт (The Wolf of Wall Street). 2013

Марцін Скарсэзэ зьняў сваю другую галоўную зорку жыцьця, пасьля Робэрта Дэ Ніра – таксама актора з італьянскімі каранямі – Леанарда Дзі Капрыё. Акрамя яго стужка поўная знакамітых актораў, сярод якіх Марго Робі, Мэцью МакКонахі.

Мы ўбачым узьлёт і падзеньне брокера ў выкананьні Дзі Капрыё. Сьвецкае жыцьцё перамяжоўваецца з карупцыяй, злачыннасьцю і арыштамі. Кампанія галоўнага героя перажывае хуткі рост з 20 супрацоўнікаў да 250-ці, што тлумачыцца буйным ростам іх актываў і абаротаў. Але заўжды жадаецца больш. Тое, што павінна стрымліваць – законы фінансавага сьвету – не бяруцца пад увагу.

Рост, які немагчыма кантраляваць. Карупцыя, якая зьядае цябе з сярэдзіны. Бліскучая роля Леанарда Дзі Капрыё.

Прыемнага прагляду!