Відавочцы: пасля «Маршу герояў» міліцыя на вуліцы Камайскай страляла па аўтамабілі

Са Свабодай звязаўся жыхар Мінска, які ўвечары 13 верасня стаў сведкам прымянення міліцыяй агнястрэльнай зброі.

«Учора, у 18:25, тры машыны ДАІ і мікрааўтобус з людзьмі ў масках гналіся за белым аўтамабілем „УАЗ“ па вуліцы Ціміразева з боку Радужнай, — расказаў сведка здарэння (ён папрасіў не публікаваць яго імя. — РС). — Дагналі на Камайскай, каля дома нумар 2. На нашых вачах з аўтамабіля ДАІ выбег даішнік і пачаў страляць з пісталета. Камеру на тэлефоне я ўключыў толькі праз секундаў 15, калі зноў з'явіўся агляд і я змог прытармазіць».
Сведка ўдакладняе, што інцыдэнт бачылі таксама іншыя людзі, якія былі побач з месцам здарэння. Ён сам не бачыў параненых у выніку страляніны. Кажа, што дакладна чуў адзін стрэл.
«Адзін стрэл дакладна, — дадае відавочца. — Мы ехалі з боку МКАД. „УАЗ“ пасля спынення засланіў бус сілавікоў. ДАІшнік быў перад першай машынай ДАІ, ля капота. Страляў з дзвюх рук, перад сабой. Гэта значыць, не ў паветра. Альбо ў чалавека, альбо ў радыятар „УАЗа“. Выбліск ад стрэлу і воблака дыму мы бачылі (у аўтамабілі разам з суразмоўцам Свабоды былі яшчэ тры чалавекі). Ці былі яшчэ стрэлы, не ведаю, бо на некалькі секундаў агляд закрылі дрэвы і ДАІшнік перамясціўся да „УАЗа“. Адзінае, у чым упэўнены на 100%, што стралялі не людзі ў масках, а супрацоўнік у форме ДАІ».

Відавочца перадаў Свабодзе зроблены на месцы падзей відэазапіс. На ім можна бачыць сілавікоў у масках побач з некалькімі затрыманымі, а таксама міліцэйскую тэхніку з уключанымі праблісковымі маячкамі. ГУУС Мінаблвыканкаму цяпер рыхтуе афіцыйны каментар аб гэтым здарэнні.