Што трэба рабіць, калі вам тэлефануюць махляры?

Тэлефонныя ашуканцы лёгка выманьваюць грошы — і людзі фактычна самі іх аддаюць. Што трэба сказаць і зрабіць, калі вам патэлефанавалі з незнаёмага нумара і палохаюць стратай грошай і свабоды? Карысныя парады.

Тэлефоннае махлярства — лёгкі і адносна бяспечны для зламысніка спосаб завалодаць чужымі грашыма. Таму што ў такіх выпадках людзі практычна самі свае грошы і аддаюць. Некалькі фраз, выкрутаў, маніпуляцый — і справа зроблена.

Знайсці ашуканцаў складана, але магчыма. Даказаць, што грошы былі аддадзены пад ціскам — задачка не з простых. Таму вельмі важна ўмець распазнаваць зламыснікаў з першых секунд тэлефоннай размовы, каб не аддаць свае грошы. Пра тое, што вы можаце зрабіць, каб ашуканцам нічога не ўдалося, Myfin спытала ў экспертаў БНБ-Банка.

• Паступае званок з банка. Што адказаць?
  

Калі гэта званок у месенджар — адразу кладзём слухаўку і нават не раздумваем. Супрацоўнікі банка ніколі не тэлефануюць па Viber або Whatsapp.

Зрэшты, ашуканцы могуць прадставіцца кім заўгодна: міліцыяй, пракуратурай, Нацыянальным банкам, Асацыяцыяй беларускіх банкаў, КДБ, а яшчэ — запалохваць артыкуламі Крымінальнага кодэкса РБ.

Вам нішто не перашкаджае завяршыць размову, праверыць у інтэрнэце афіцыйны кантактны нумар арганізацыі або аб'яднання, прадстаўніком якога назваўся махляр, ператэлефанаваць і ўдакладніць мэту званка.

Тэлефануюць нібыта з вашага банка? Усё яшчэ прасцей: тэлефон кантакт-цэнтра заўсёды пазначаны на адваротным баку вашай аплатнай карткі.

Тэлефануюць нібыта з банка, у якім вы ніколі не абслугоўваліся? Вас абсалютна дакладна спрабуюць падмануць.

• Як ашуканцы выманьваюць грошы?

Эмацыйны ціск — найбольш упадабаны інструмент тэлефонных махляроў.

З першых жа секунд размова нагнятаецца рызыкай страты вашых грошай або свабоды па розных прычынах: афармленне крэдыту, пацвярджэнне правядзення аперацыі на буйную суму, завядзенне крымінальнай справы або вядзенне следства.

А далей суразмоўца прапануе (зразумела, дзеля вашай бяспекі!) усталяваць якую-небудзь праграму на ваш смартфон: антывірус, шыфравальшчык даных, парольную абарону.

На самай справе так хаваецца праграма, якая дае ашуканцам магчымасць атрымліваць поўны доступ да вашай прылады, каб зрабіць любыя махінацыі без вашага ведама.

Звяртаем увагу! Для паўнавартаснай працы банкаўскіх праграм-прыкладанняў не патрабуюцца ніякія дадатковыя праграмы. Устаноўка нейкай іншай праграмы падстаўляе пад небяспеку ўсю інфармацыю на вашым тэлефоне

• Што яшчэ могуць прасіць або абяцаць ашуканцы?

Захоўваць маўчанне і не распавядаць пра размову трэцім асобам.

Не звяртацца ў міліцыю ці ў банк па пацвярджэнне, таму што нібыта ловяць супрацоўніка банка.

Вяртанне грошай і пагашэнне «крэдыту».

Ні супрацоўнікі банка, ні супрацоўнікі органаў не будуць прымушаць вас захоўваць маўчанне па тэлефоне. Для гэтага ёсць дакумент аб невыдаванні, які падпісваецца выключна на паперы!

• Што рабіць?

Перш за ўсё пасля такога званка важна праверыць тэлефон на падазроныя і незнаёмыя праграмы-прыкладанні, а таксама звярнуцца ў банк і паведаміць пра махлярства. Супрацоўнікі банка дапамогуць разабрацца ў сітуацыі і зарыентуюць у далейшых дзеяннях.