Сведкі-міліцыянты на судзе ў Пінску не разумелі беларускай мовы
На 20 базавых велічыняў аштрафаваў суд у Пінску актывіста Руху «За Свабоду» Алеся Аўсеенку за ўдзел у акцыі 26 сакавіка. Гэта ўжо другое аналагічнае рашэнне па гэтай справе.
27 красавіка суддзя суда Пінскага раёна і горада Пінска Свіцін Д.В аштрафаваў спадара Аўсеенку за ўдзел у акцыі пратэсту на плошчы Леніна 26 сакавіка. Праз працэдурныя парушэнні Брэсцкі абласны суд адмяніў гэтае рашэнне і вярнуў справу ў Пінскі суд.
Сёння, 11 жніўня, быў ужо трэці дзень пасяджэння: учора заслухалі паказанні сведкаў-міліцыянтаў, але вынясенне рашэння суддзя адклаў на сёння.
«Мне прысудзілі штраф у 20 базавых велічыняў», — сказаў сайту Pyx.by Алесь Аўсеенка.
Ён называе гэты прысуд прадказальным.
«Я ілюзій не меў. Сістэма працуе, не можа абмінуць, тады іншыя будуць на вуліцу выходзіць», — дадаў актывіст Руху «За Свабоду».
Ён падкрэсліў, што найбольш яго ўразіла, што міліцыянты, якія сведчылі на судзе, не разумеюць беларускую мову.
Аўсеенка на сёння яшчэ не вырашыў, ці будзе абскарджваць рашэнне суда. «Хочацца, але кожнае абскарджанне — гэта дзве базавых велічыні і перапіска. Думаю», — дадаў ён.
«Рашэнне суда было прадказальным. Гэтыя рашэнні па справам вясновых пратэстаў у Пінску, амаль што ва ўсіх аднолькавыя. Калі чалавек прысутнічаў на судзе, то атрымліваў штраф у 10 базавых велічынь. Калі суд адбываўся без прысутнасці асобы, якая прыцягваецца да адміністрацыйнай адказнасці, як, напрыклад, Руслан Гусейнаў, — то 20 базавых велічынь. Нам вядома што былі нейкія спісы і вызначаная колькасць людзей, якіх патрэбна было пакараць», — распавёў сайту Pyx.by гарадскі каардынатар у Пінску Алесь Рамановіч.
Ён таксама пацвердзіў, што міліцыянты не разумелі беларускай мовы. «Працэс вёўся на беларускай мове, але сведкі давалі сведчанні на рускай. Бывала, што судзі прыходзілася перакладаць пытанне, што задаваў сведкам спадар Аўсеенка», — заключыў Рамановіч.