Рэчыца: суд апраўдаў журналіста-фрылансера
Добрую вестку перадае з Рэчыцы праваабаронца «Вясны» Валер Пуціцкі: раённы суд спыніў у сувязі з недаказанасцю віны справу журналіста Андрэя Мядзведзева.
Такую пастанову вынесла суддзя Марыя Кацуба, вывучыўшы пратаколы адміністрацыйнага правапарушэння за выраб прадукцыі для тэлеканала "Белсат" па арт 22.9 КаАП.
Суд над журналістам і каардынатарам курсаў “Мова Нанова” Андрэем Мядзведзевым распачаўся 30 кастрычніка. Падчас працэсу высветлілася, што 13 верасня, калі паводле пратаколу журналіст здзяйсняў правапарушэнне, ён знаходзіўся ў Тураве і мае на гэта сведку. Тады суддзя вырашыла выклікаць сведак у суд і перанесла пасяджэнне на 1 лістапада.
Каментуючы рашэнне суда Рэчыцкага раёна на сваёй старонцы ў фэйсбуку, Андрэй Мядведзеў кажа, што справу высмакталі з пальца:
“Незразумела, як суд мог прыняць такую справу да разгляду — недаказанасць віны там была бачная нават не юрыстам. Суд спрабаваў замяніць сабой міліцыю і сам пашукаць доказы маёй віны. Але так і не знайшоў, і мусіў апраўдаць. Падпалкоўнік Зуеў з Гомельскага УУС высмактаў гэтую справу з ніадкуль і ўвёў у зман кіраўніцтва і суд.
А Рэчыцкаму аграрнаму каледжу, выпускнікі якога ў асноўным і служаць афіцэрамі ў мясцовым РАУСе, варта ўвесці больш паглыбленае вывучэнне прадмета "Асновы права".
На мінулым тыдні Мядзведзеў атрымаў па пошце адміністрацыйны пратакол, складзены ўчастковым інспектарам райаддзела міліцыі Аляксеем Цімошчанкам на падставе часткі 2 артыкула 22.9 КаАП — “Парушэнне заканадаўства аб сродках масавай інфармацыі”.