Памёр міліцыянт, якога падпалілі падчас допыту ў Шклове
Шклоўскі міліцыянт, якога мужчына падчас допыту падпаліў разам з сабой, памёр у бальніцы.
Сляды падпалу ў будынку РАУС
27-гадовы міліцыянт, якога тыдзень таму падпалілі падчас допыту, памёр. Міліцыянт з моцнымі апёкамі больш за тыдзень быў у шпіталі.
Сёння міліцыянта са шклоўскага РАУС пахавалі.
Нагадаем, 31 траўня ў будынку раённага аддзела ўнутраных спраў, мужчына, якога выклікалі на допыт, падпаліў сябе і следчага. Мужчына-падпальшчык адразу загінуў. Следчы атрымаў моцныя апёкі.
Па інфармацыі СМІ, пацярпелага следчага звалі Дзмітрый Хадарэнка, яму было 27 гадоў. У траўні 2018 года на сайце раённай газеты «Ударны фронт» выходзіла публікацыя аб працы Шклоўскага РАУС, у ёй згадваўся оперупаўнаважаны крымінальнага вышуку Дзмітрый Хадарэнка. Тады ён распавядаў, што ўладкаваўся ў райаддзел у жніўні 2017 года, прыйшоў пасля інстытута МУС, «можна сказаць, здзейсніў дзіцячую мару».
Праз пяць месяцаў, у кастрычніку 2018-га, на святкаванні юбілею крымінальнага вышуку Беларусі Дзмітрыю Хадарэнку ўручылі грамату УУС Магілёўскага аблвыканкама, ён быў у званні старшага лейтэнанта міліцыі. Увосень 2020-га таксама атрымаў грамату ад начальніка УУС.