«Не даюць працаваць. Штрафы, праверкі...» Уладальніца «Перасмешніка» патлумачыла, чаму выставіла бар на продаж

Бар «Перасмешнік» з вуліцы Няміга, 5, выстаўлены на продаж. Уладальніца ўстановы патлумачыла TUT.BY, чаму прыняла такое рашэнне.



У аб'яве пазначана, што даволі вядомы бар прадаецца як гатовы бізнэс у цэнтры горада. З асаблівасцяў: 168 м2, першы паверх у гандлёвым цэнтры, праекту амаль чатыры гады. Канкрэтная цана продажу не пазначана, пазначаная як «дагаворная».

Уладальніца «Перасмешніка» Вольга Мазур патлумачыла, чаму прыняла такое рашэнне.

— Я доўга над гэтым думала, не магла вырашыцца. Але сітуацыя стала крытычнай. «Перасмешніку» не даюць працаваць. Штрафы, праверкі. Нас закрылі ўжо чацвёрты раз і ўжо другі тыдзень не адкрываюць. І я разумею, што гэта не канец. А ў мяне за спіной хлопцы. У іх сем'і, здымныя кватэры, ды і проста трэба нешта есці. Мець працу, якую ты любіш і не можаш кінуць (з-за мяне, калектыву, гасцей), але якая зусім не прыносіць табе грошай, бо проста няма магчымасці іх зарабляць — такое сабе задавальненне. Таму я вырашыла гэта зрабіць не дзеля сябе, а дзеля таго, каб захаваць «Перасмешнік» і яго каманду. Вельмі спадзяюся, што знойдуцца добрыя людзі, якія змогуць палюбіць гэты казачны бар і хлопцаў, якія там працуюць.

«Перасмешнік» адкрыўся 30 снежня 2016 года. Гэта бар з аўтарскай кухняй і жывой музыкай. Не працаваў у дні страйкаў гэтай восенню, пасля чаго ў ўстанова, як, зрэшты, і ў іншыя, прыйшлі праверкі, якія то адкрываюць, то ізноў зачыняюць ўстанову.

Цяпер яго адзіная ўладальніца — рэстаратар Вольга Мазур, якая запускала гэты праект разам з былым мужам Кімам. Яна таксама была саўладальніцай праектаў «Вінная шафа» (цяпер зачынены) і «Ayahuasca», мела дачыненне да запуску «IZI Bar». У лістападзе саму Вольгу судзілі паводле артыкула 23.34 КаАП за ўдзел у акцыі пратэсту 6 верасня. Некаторы час яна правяла ў ізалятары на Акрэсціна, ёй далі штраф у 25 базавых велічынь.