МЗС: за час пандэміі з-за мяжы было вернута 7400 беларусаў

У цяперашні час на радзіму ўдалося вярнуць 7 тысяч 400 беларусаў, якія затрымаліся за мяжой у сувязі з распаўсюджваннем каронавіруснай інфекцыі. Праца ў гэтым кірунку працягваецца, заявіў прэс-сакратар Міністэрства замежных спраў Беларусі Анатоль Глаз 2 траўня ў эфіры перадачы «Ток-шоу АТН» на тэлеканале «Беларусь 1», перадае БелаПАН.

— Людзі ляцяць і едуць нават цяпер. Выбудавана і наладжана сістэма ва ўзаемадзеянні з «Белавія», з усімі нашымі суседзямі праведзены размовы. Калі ўсё гэта пачыналася, калі, як снежны ком, усе краіны ўводзілі абмежаванні, зачынялі пункты пропуску і аэрапорты, сітуацыя была падобная на надзвычайную. Тады прымаліся рашэнні, якія ніхто не ведаў, як рэалізоўваць на месцах, прыходзілася ў кругласутачным рэжыме працаваць. Асноўная нагрузка клалася на замежныя ўстановы, якія знаходзіліся з нашымі грамадзянамі ў непасрэдным кантакце, — распавёў Глаз.
Ён адзначыў, што МЗС працаваў у цесным кантакце з Міністэрствам аховы здароўя, Міністэрствам транспарту і камунікацый, Міністэрствам спорту і турызму, Дзяржпагранкамітэтам, з авіякапманіяй «Белавія». Адгукнуліся і прыватныя кампаніі — сотавыя аператары дазволілі бясплатныя званкі ў роўмінгу на гарачыя лініі пасольстваў, каб беларускія грамадзяне, якія застаюцца за мяжой, маглі быць на сувязі.
Па словах Глаза, першапачаткова было прынята рашэнне вывозіць з іншых краін не толькі беларусаў, але і грамадзян іншых краін:
— Вырашылі дапамагаць, дзе можна, усім, нікога не кідаць. Таму, вядома, яны ляцяць нашымі самалётамі, з'язджаюць нашымі аўтобусамі — гэта грамадзяне Літвы, Латвіі, Польшчы і шэрагу іншых краін.
Прэс-сакратар звярнуў увагу на тое, што пры эвакуацыі сям'і, дзе муж альбо жонка не з'яўляецца грамадзянінам Беларусі, не падзяляюцца.
tut.by