Мінпрацы: Гісторыя пацвярджае значнасць ідэалаў Кастрычніцкай Рэвалюцыі

Улады адмовілі ў пераносе выходнага з 7 на 2 лістапада. 

Гарадзенскі гарадскі каардынатар Беларускай хрысціянскай дэмакратыі Яўген Дудкін атрымаў з Міністэрства працы і сацыяльнай абароны насельніцтва адказ на калектыўны зварот з просьбай перанесці выходны дзень з 7 лістапада, Дня Кастрычніцкай рэвалюцыі, на 2 лістапада, Дзяды, паведамляе bchd.info. Абодва дні ў Беларусі святочныя, аднак Дзяды не з’яўляюцца выходным.
У звароце нагадвалася, што Канстытуцыя Беларусі забараняе ўсталяванне ідэалогіі палітычных партый у якасці абавязковай для грамадзян, тады як 7 лістапада ўшаноўваецца менавіта гісторыя Камуністычнай Партыі Савецкага Саюза, якая ўсталявала аднапартыйную сістэму ў Беларусі, руйнавала храмы, арганізавала ганенні на веруючых і масавыя рэпрэсіі супраць інтэлігенцыі, сялян і працоўных.
Замест 7 лістапада прапаноўвалася зрабіць выходным днём 2 лістапада, Дзень памяці, або Дзяды, які ўмацуе сямейныя каштоўнасці праз наведванне членамі сям’і могілак продкаў, а ў рамках абвешчанага 2018 года Годам малой радзімы ўзмацніць магчымасці грамадзян ў навядзенні парадку ў малых населеных пунктах.
Але ў адказе з Мінпрацы за подпісам першага намесніка міністра Андрэя Лабовіча гаворыцца, што “прапанова пра перанос выхаднога дня з 7 лістапада на 2 лістапада ў цяперашні час не разглядаецца”. Паводле яго, у Беларусі і так ёсць тры выходныя рэлігійныя святы (Раство 7 студзеня і 25 снежня, Радаўніца), а абвяшчэнне “яшчэ аднаго непрацоўнага святочнага дня (рэлігійнага свята) для вернікаў пэўнай канфесіі можа выклікаць незадаволенасць вернікаў іншых канфесій”.
Больш за тое, заяўляе міністр, “дата 7 лістапада – Дзень Кастрычніцкай рэвалюцыі, стала адной з самых значных падзей XX стагоддзя і карэнным чынам паўплывала на ход далейшай гісторыі”.
“Гісторыя пацвярджае значнасць ідэалаў Вялікай Кастрычніцкай Сацыялістычнай Рэвалюцыі – вызваленне працоўных ад эксплуатацыі і прыгнёту, зацвярджэнне раўнапраўя і сацыяльнай справядлівасці. Дадзеныя прынцыпы закладзены ў Канстытуцыі Рэспублікі Беларусь. А для кагосьці гэта проста яшчэ адзін выхадны, на працягу якога можна проста адпачыць або правесці час з сям'ёй”, — заяўляе Андрэй Лабовіч.