У якія галіны інвестуюць беларусы ў Польшчы? Топ-20

За апошнія паўтара года колькасць кампаній у Польшчы, у якіх хоць бы адным з заснавальнікаў з'яўляецца беларуская фізічная або юрыдычная асоба, амаль падвоілася.

Беларусь выйшла на трывалае трэцяе месца (пасля Украіны і Германіі) па колькасці зарэгістраваных там замежных бізнесаў.

Адбыліся прыкметныя змены і ў галіновых перавагах інвестараў з Беларусі. Якія — у сваім даследаванні высветліў Thinkthanks. 

Транспартнікі — у лідарах, IT — ужо другая

Прыкладна з сярэдзіны 2022-га па канец 2023-га, па даных Centralny Ośrodek Informacji Gospodarczej (Галоўнага цэнтра эканамічнай інфармацыі), колькасць кампаній з беларускім капіталам у Польшчы вырасла на 42,8% — з 3709 да 6491.

У галіновым разрэзе лідарства ўтрымалі транспартнікі, на якіх прыпадае крыху менш за шостую частку ад усіх зарэгістраваных у суседзяў беларускіх камерцыйных структур.

Колькасць аўтаперавозкавых кампаній з беларускімі заснавальнікамі павялічылася на 48,5% і перавысіла 1 тысячу. Як падлічыў Thinkthanks, з замежнікаў сёння на польскіх дарогах больш толькі ўкраінскіх бізнесаў.

Істотны прырост у разгляданым перыядзе адбыўся ў дзвюх высокатэхналагічных галінах — у IT і e-commerce. У выніку гэтыя дзве галіны перамясціліся, адпаведна, на 2-е і 4-е месцы. Яны пасунулі з гэтых пазіцый будаўніцтва і неспецыялізаваны аптовы гандаль, якія павольней раслі па новых рэзідэнтах. 

Хто ў лідарах?

Лідарамі па прыросце новых бізнесаў, аднак, сталі не IT і e-commerce.

За паўтара года яшчэ больш імкліва расла цікавасць беларусаў да дылерства аўтамабіляў (прырост — 67,6%), адкрыцця цырульняў і касметычных салонаў (59,4%) і рэкламнай дзейнасці (58,8%).

У выніку цырульні і касметычныя салоны занялі ў топ-20 самых папулярных галін для інвестыцый 7-е месца, а аптовы і рознічны продаж легкавых аўтамабіляў – 8-е месца. З першай дзясяткі яны выціснулі кансультантаў у сферы бізнесу і кіравання і аптавікоў па драўніне, будматэрыялах і сантэхніцы.

У топ-20 па выніках 2023 года ўвайшлі рэкламныя агенцтвы, якія апярэдзілі па рэгістрацыях «іншыя рознічныя продажы ў неспецыялізаваных крамах».

Таксама больш чым напалову павялічылася колькасць кампаній, якія займаюцца аздобнымі паслугамі і будаўніцтвам электраўстановак.

Хто ў аўтсайдарах? 

Галінамі-аўтсайдарамі, у якіх за гэты перыяд назіраўся найменшы прырост па новых бізнесах, сталі кансультацыйная дзейнасць (20%), дзейнасць агенцтваў часовай занятасці (25%) і дзейнасць, звязаная з пошукам працы і прыцягненнем работнікаў (27,1%).

Прыкметна скараціўся інвестыцыйны інтарэс беларусаў да дэвелаперскай дзейнасці. З чацвёртага месца ў сярэдзіне 2022 года гэтая галіна перамясцілася ўжо на 10-е. За паўтара года ў сферы рэалізацыі будаўнічых праектаў, звязаных з узвядзеннем будынкаў, прырост склаў усяго 29,4%.

Топ-20 самых папулярных галін, у якія інвестуюць беларусы ў Польшчы

Паводле Centralny Ośrodek Informacji Gospodarczej