Інфляцыя ў Беларусі за 11 месяцаў склала 6,6 працэнта. Што падаражэла найбольш?

Эканоміка

У лістападзе 2020 года спажывецкія цэны ў параўнанні з папярэднім месяцам выраслі на 0,7%, у параўнанні са снежнем 2019 года — на 6,1 працэнта, гадавая інфляцыя склала 6,6 працэнта.

1554274587_1.jpg


«Рост спажывецкіх цэн у гадавым вымярэнні на 0,4% шмат у чым абумоўлены падаражаннем за апошнія 12 месяцаў асобных нехарчовых тавараў і харчовых тавараў крытычнага імпарту (перш за ўсё за кошт паслаблення беларускага рубля і неспрыяльнай замежнай кан’юнктуры)», — патлумачылі ў Міністэрстве антыманапольнага рэгулявання і гандлю Беларусі (МАРГ), перадае Радыё Свабода.

Паводле МАРГ, у гадавым вымярэнні па-ранейшаму найбольш выраслі цэны на тавары, імпартаваныя з-за мяжы (на фоне курсавых ваганняў):

  • алей — падаражэў на 24,2%,
  • электратавары — на 13,4%,
  • тэлевізары — на 7,1%,
  • сінтэтычныя мыйныя сродкі — на 9,4%.

Рост цэн за год на садавіну і агародніну паскорыўся да 10,5% (9,2% месяц таму).

У параўнанні з папярэднім месяцам у лістападзе найбольш падаражэлі:

  • бульба — на 3,1%,
  • памідоры — на 30,2%,
  • агуркі — на 20,1%,
  • перац — на 8,5%

У групе харчовых тавараў падаражэлі:

  • мяса і мясапрадукты — на 0,5%,
  • малако і малочныя прадукты — на 0,8%,
  • алеі і тлушчы — на 2,8%,
  • яйкі курыныя — на 5,2%,
  • цукар — на 7,2%.

Таксама ў лістападзе (у параўнанні з кастрычнікам) планава павялічаныя тарыфы на ацяпленне (на 7,1%) і паслугі сувязі (на 2,5%). Адзначаецца рост цэнаў на цыгарэты (на 0,6%) і гарэлку (на 0,2%). На 1,7% падаражэлі лекі.

У сферы рэгуляванага цэнаўтварэння за месяц прырост цэн і тарыфаў у гадавым вымярэнні склаў 6,5%, удакладняюць у МАРГ.

  • паслугі ЖКХ падаражэлі на 8,4%,
  • пладоваагароднінная прадукцыя — на 10,5%,
  • пасажырскі транспарт — на 15,5%,
  • лекі — на 8%,
  • адзенне — на 4,2%.

Паводле планаў ураду і Нацбанку, інфляцыя ў 2020 годзе не павінна была перавысіць 5%.