Аўтамабільны збор у Беларусі не стане больш справядлівым

У Беларусі прапануюць увесці больш справядлівы аўтамабільны збор, аднак у міністэрстве транспарту і камунікацыі заяўляюць, што рабіць гэта не будуць, піша БДГ.

Пытанне спагнання дзяржпошліны за выдачу дазволу на допуск транспартнага сродку да ўдзелу ў дарожным руху патрабуе перагляду, паколькі выплата фіксаванай сумы дзяржпошліны ў залежнасці ад масы аўтамабіля не ўлічвае тое, як часта чалавек ім карыстаецца, адзначыў у эфіры радыёстанцыі «Мінская хваля» гендырэктар «Мінскаблдорбуда» Дзяніс Сцяпанаў.
Вырашыць праблему, паводле яго слоў, можна, заклаўшы суму транспартнага падатку ў кошт паліва. Прапанаваны варыянт, лічыць Дзяніс Сцяпанаў, быў бы больш эфектыўны і справядлівы, паколькі аўтаўладальнік плаціў бы ў залежнасці ад таго, колькі ездзіць. Акрамя таго, дадаў ён, замежнікі, калі едуць у Беларусь, не плацяць транспартны збор, асабліва калі рухаюцца па бясплатным дарогах, аднак пры гэтым яны карыстаюцца паслугамі АЗС.
Але першы намеснік міністра транспарту і камунікацыі Аляксей Аўраменка ў эфіры «Беларусь 1» адзначыў, што дарожны збор у кошт паліва ўключаць не будуць. Ён нагадаў, што такая схема дзейнічала да 2008 года, калі дзейнічаў рэспубліканскі дарожны фонд, а з акцызаў на паліва фінансавалася дарожная гаспадарка. Але затым акцызы адмянілі і ўвялі «падатак на дарогі». «Механізм можа быць ўдасканалены, але пытанне аб уключэнні дарожнага збору ў паліва не разглядаецца», — падкрэсліў намеснік міністра.
«Падатак на дарогі» быў уведзены ў Беларусі з 2014 года. А з 2016 года транспартны падатак для пенсіянераў перастаў быць ільготным.