Жыхара Пецярбурга затрымалі і судзілі за цытату Пуціна

Выбарскі раённы суд Пецярбурга аштрафаваў на 30 тысяч расійскіх рублёў мясцовага жыхара Артура Дзмітрыева, прызнаўшы яго вінаватым паводле артыкула аб дыскрэдытацыі расійскага войска, паведамляе «ОВД-Інфа».

7 красавіка Дзмітрыева затрымалі, калі ён зладзіў адзіночны пікет супраць вайны. У руках у пратэстоўца быў ліст паперы з недакладнай цытатай прэзідэнта РФ Уладзіміра Пуціна пра Вялікую Айчынную вайну: «Вайна прынесла столькі гора, што забыць гэта немагчыма. Няма прабачэння тым, хто зноў выношвае агрэсіўныя планы».

Пасля затрымання Артур Дзмітрыеў правёў ноч у аддзеле паліцыі. Суд разгледзеў адміністрацыйны пратакол у дачыненні да пецярбуржца ўвечары 8 красавіка.