Воспа малпаў крочыць па планеце. Дасье ў карыкатурах
Воспа малпаў імкліва распаўсюджваецца па свеце, што таксама знаходзіць адлюстраванне ў карыкатурах.
У траўні 2022 года ў свеце зарэгістравалі адразу некалькі ўспышак малпавай воспы (Monkeypox). Да 21 траўня пацвердзіліся 90 выпадкаў захворвання. Для хваробы характэрны ліхаманка і агульная інтаксікацыя арганізма. Але перш за ўсё высыпанні на скуры. Таму, як правіла, хворых малююць з сыпам на целе.
Безумоўна, карыкатурысты не прайшлі міма дзіўнай з'явы: новая эпідэмія з'явілася сінхронна таму, як пачала спадаць пандэмія COVID-19. Напрыклад, на адной з карыкатур сям'я радуецца заканчэнню эпідэміі ў той час як у вакне з'яўляецца жудасны твар малпы.
У прынцыпе, малпы дастаткова пазітыўны персанаж у масавай культуры. Не дзіўна, што спробы стварыць графічны сімвал новай эпідэміі выглядаюць дастаткова пацешна.
Дарэчы, многія тут жа ўзгадалі сюжэт вядомага фільма «Планета малпаў» пра тое, як малпы захапілі на Зямлі ўладу, выцесніўшы цывілізацыю людзей. Адзін з мастакоў падазрае, што ўсё магло пачацца са з'яўлення Monkeypox.
Яшчэ адзін цікавы аспект. Аказваецца, у серыяле «Сімпсаны» прадказалі таксама і гэты сусветны катаклізм. Амерыканская мультсямейка нешта ведала пра воспу малпаў. Фанаты ўспомнілі эпізод, у якім Гамер пакрыўся сыпам пасля пасядзелак з малпай.
Застаецца сказаць, што да гэтага часу маштабы пагрозы не зразумелыя. Калі ўсё ж новая хвароба сапраўды будзе выклікам для чалавецтва, то адно з наступстваў такога сцэнара лёгка прагназуем. Над гэтым іранізуе адзін з графікаў.
