Reuters: РФ і Венесуэла вядуць таемныя перамовы

Масква крэдытамі ратуе ўрад Нікаласа Мадуры ад дэфолту ў абмен на доступ да нафтавых радовішчаў, піша Reuters.

Урад Расіі ў тэрміновым парадку крэдытуе ўлады Венесуэлы, каб выратаваць ад банкруцтва дзяржаву, якую ўзначальвае Нікалас Мадура. Узамен Масква атрымае доступ да багатых венесуэльскіх радовішчаў нафты. Пра гэта паведаміла агенцтва Reuters са спасылкай на неназваныя крыніцы ў палітычных і дзелавых колах, знаёмыя з ходам перамоваў.

 Паводле дадзеных агенцтва, дзяржаўная нафтагазавая кампанія Венесуэлы PDVSA ўжо некалькі месяцаў у закрытым рэжыме вядзе перамовы з “Раснафтай” аб капіталаўкладаннях у самыя прадукцыйныя нафтавыя радовішчы.

Гаворка ідзе прыкладна аб дзевяці новых аб'ектах у дадатак да ўжо наяўных у распараджэнні канцэрна пяці аб'ектаў, паведамілі агенцтву высокапастаўленыя ўрадавыя чыноўнікі ў Каракасе.

Адзначым, у красавіку “Раснафта” заплаціла больш за 1 мільярд долараў у абмен на гарантыю будучых паставак нафты, заявіў прадстаўнік кіраўніцтва PDVSA. Як мінімум у дзвюх сітуацыях расійскія грошы дапамаглі Венесуэле пазбегнуць дэфолту, а Мадуры — утрымацца ва ўладзе.

Афіцыйна бакі адмовіліся каментаваць Reuters гэтую інфармацыю.

Раней Пуцін і Мадура абмеркавалі сітуацыю на сусветным рынку нафты.

korrespondent.net