Расійцы пачалі прымусовую мабілізацыю на захопленых тэрыторыях Украіны

Прымусовая мабілізацыя пачатая на захопленых расійцамі тэрыторыях Херсонскай, Запарожскай і Харкаўскай абласцей.

Расійскія захопніцкія войскі праводзяць прымусовую мабілізацыю, у тым ліку медыкаў, на акупаваных украінскіх тэрыторыях поўдня і ўсходу.

Пра гэта паведамляе Галоўнае ўпраўленне выведкі Міністэрства абароны Украіны ў Facebook.

«Акупанты праводзяць мабілізацыю ўкраінскіх медыкаў, якія застаюцца на акупаваных тэрыторыях», — адзначаецца ў паведамленні. У прыватнасці, дадаюць у выведцы, у горадзе Ваўчанск (Харкаўская вобласць) малодшы медыцынскі персанал устаноў першаснай медыка-санітарнай дапамогі прымусова адпраўляюць на перадавую для аказання першай медыцынскай дапамогі параненым расійскім салдатам, у выпадку адмовы пагражаюць расстрэлам.

Таксама пачатыя мабілізацыйныя мерапрыемствы сярод мясцовага насельніцтва на акупаваных тэрыторыях Херсонскай, Запарожскай і Харкаўскай абласцей.

«З мэтай забеспячэння мабілізацыйных мерапрыемстваў практычна цалкам перакрытая магчымасць выезду з Херсонскай вобласці на кантраляваныя Украінай тэрыторыі. Значна абмежаваная магчымасць выезду ў бок РФ», — сказана ў паведамленні.

Акрамя таго, у Запарожскай вобласці расійскія вайскоўцы і супрацоўнікі ФСБ шукаюць людзей прызыўнога ўзросту. «Менавіта яны павінны папоўніць склад баявых падраздзяленняў РФ на найбольш праблемных кірунках», — гаворыцца ў паведамленні.

У ГУР адзначылі, што гэтыя мерапрыемствы праводзяцца нягледзячы на пераважна праўкраінскую настроенасць насельніцтва абласцей і агульную матывацыю супраціўляцца расійскім захопнікам.

Раней упаўнаважаная ВР Украіны па правах чалавека Людміла Дзянісава распавядала, што на часова акупаванай тэрыторыі Данецкай вобласці акупанты прымусова мабілізуюць дзеячаў культуры, студэнтаў ВНУ і іх выкладчыкаў.

Акрамя таго, па даных Дзянісавай, акупацыйная ўлада так званых «ЛНР» і «ДНР» мабілізуе ў незаконныя ўзброеныя фарміраванні непаўналетніх хлопцаў. На вайну адпраўляюць дзяцей, якія былі сябрамі патрыятычных клубаў.

Паводле unian.net.