Правыя экстрэмісты ўсё часцей выкарыстоўваюць сацсетку «Укантакце»

Нямецкія эксперты адзначаюць, што сацсетка vk.com у правых экстрэмістаў лічыцца "надзейным месцам". Адміністрацыя "Укантакце" не зацікаўленая ў выдаленні супрацьпраўнага кантэнту.

Правыя экстрэмісты ў сувязі з узмацніўшымся кантролем усё часцей выкарыстоўваюць сацыяльную сетку vk.com. Пра гэта сведчаць дадзеныя партала hass-im-netz.info, якія апублікаваныя ў панядзелак, 22 кастрычніка. Расійская сетка лічыцца "надзейным месцам", таму што яе адміністратары рэдка выдаляюць супрацьзаконныя запісы карыстальнікаў.
На старонках "Укантакце" прадстаўлены "ўвесь спектр правых экстрэмістаў", гаворыцца ў паведамленні, а мультымедыйныя магчымасці сацсеткі з'яўляюцца асабліва небяспечнымі для моладзі, паколькі да розных матэрыялаў, у тым ліку, відэазапісаў забойстваў, можна атрымаць доступ "без узроставага кантролю". Закон аб абароне правоў у сацыяльных сетках, які пачаў дзейнічаць у Германіі год таму, прывёў да таго, што правыя экстрэмісты пачалі шукаць для сябе альтэрнатыўныя платформы.
"Хоць правыя экстрэмісты ўсё часцей выкарыстоўваюць "Укантакце ", сама сацсетка не выказвае зацікаўленасці ў выдаленні супрацьпраўнага кантэнту пры паступленні адпаведных паведамленняў ад карыстальнікаў. Унутраныя правілы суполкі таксама не прымяняюцца з патрэбным эфектам", — гаворыцца ў паведамленні hass-im-netz.info . Эксперты адзначаюць, што "структурныя праблемы" ў vk.com застаюцца ранейшымі: прапаганда нянавісці і іншыя сур'ёзныя парушэнні не прыводзяць да наступстваў.
dw.com