«Morgan Stanley»: Дэфолт чакае Расію ў сярэдзіне красавіка

Адна з найбуйнейшых фінансавых карпарацый свету «Morgan Stanley» прадказвае дэфолт Расіі ўжо ў сярэдзіне красавіка. Гэта звязана з тым, што менавіта тады скончыцца 30-дзённы льготны перыяд па чарговым купоне доларавых бондаў з пагашэннем у 2023 і 2043 гадах.

«Мы разглядаем дэфолт як найбольш верагодны сцэнар. Ён наўрад ці будзе падобны да звычайнага дэфолту. Найбольш прыдатным параўнаннем з'яўляецца Венесуэла», — мяркуе Сайман Уэвер, кіраўнік па стратэгіі суверэннага крэдытавання рынкаў, якія развіваюцца.

На яго думку, дэфолт можа настаць ужо 15 красавіка, калі скончыцца 30-дзённы льготны перыяд па выплаце купоннага даходу па доларавых аблігацыях з пагашэннем у 2023 і 2043 гадах.

Арыенціровачныя цэны паказваюць, што інвестары ацэньваюць аблігацыі 2023 прыкладна ў 29 цэнтаў за ўкладзены долар ЗША, што з'яўляецца самым нізкім паказчыкам за ўсю гісторыю, хоць здзелак на гэтым узроўні не было. За некалькі дзён да ўварвання Расіі ва Украіну ў мінулым месяцы доўг гандляваўся вышэй за намінал.

Хоць суверэнны доўг рэдка скочваецца да адназначных лічбаў, эксперт «Morgan Stanley» кажа, што расійскія аблігацыі «могуць блізка падабрацца» да такога ўзроўню. Ліван і Венесуэла — адзіныя і нядаўнія прыклады падзення кошту дзяржаўнай запазычанасці да такога нізкага ўзроўню.

Адмова ад выплаты купона можа быць абумоўлена нежаданнем Расіі плаціць замежным крэдыторам з-за санкцый, уведзеных ЗША і іх саюзнікамі. Акрамя таго, існуе няпэўнасць, ці дазволяць банкам ЗША прымаць купонныя плацяжы ад Міністэрства фінансаў Расіі.