Грузія. Другое прышэсце блізка…

Каталікос — патрыярх Грузіі 12 студзеня ў сваёй традыцыйнай нядзельнай пропаведзі ў кафедральным саборы Тбілісі прадказаў блізкасць другога прышэсця Хрыста і заклікаў прыхаджан падрыхтавацца да гэтай падзеі.

«Другое прышэсце вельмі блізка, і мы павінны зрабіць усё для таго, каб падрыхтавацца да яго. Я чуў ад некаторых вернікаў, што гэты час вельмі блізкі, і сказаў бы, што да яго засталося ўсяго некалькі дзён», — заявіў Ілля Другі.

Трэба сказаць, што, паводле святых тэкстаў, перад тым, як адбудзецца другое прышэсце Хрыста, уваскрэснуць усе мёртвыя. Душы людзей, якія ўжо памерлі, злучацца са сваімі целамі. Пасля гэтага адбудзецца фінальная бітва Хрыста з Сатаной і падзел на царства Божае і пекла.

Цяжка сказаць, дзе Каталікос угледзеў прыкметы падобных з’яваў, але казаць пра другое прышэсце, безумоўна, яго права.

Можна таксама дадаць, што 29 снежня 2019 года грузінскі патрыярх на сустрэчы з сакратаром Ватыкану, кардыналам П’етра Паралінам заявіў, што «чалавецтва падышло да краю прорвы».

Паводле грузінскай прэсы