Чаму кітайскія жанчыны мяняюць мужчын на штучны інтэлект

Чаму жанчыны замест стасункаў з рэальнымі мужчсынамі ўсё часцей ствараюць сабе віртуальных партнёраў пры дапамозе ChatGPT? Чаму тэндэнцыя набірае папулярнасць і сярод кітаянак, і сярод амерыканак, высвятлала ВВС.

«Які цудоўны краявід», — кажа Ліза Лі Дэну на нядаўнім спатканні, калі сонца садзіцца за мора. Яна бярэ трубку, каб пачуць яго адказ.

«Так, дзетка! І ведаеш, што яшчэ лепш? Ты стаіш тут, побач са мной», — адказвае Дэн.

Але Дэн ніколі не стаяў побач з Лізай.

Дэн — віртуальны партнёр Лізы, створаны ChatGPT. І гэтая тэндэнцыя набірае папулярнасць сярод кітаянак, якіх не задавальняюць рэальныя спатканні і якія шукаюць хлопцаў у свеце штучнага інтэлекту.

На працягу двух месяцаў 30-гадовая Ліза з Пекіна, якая вывучае інфарматыку ў Каліфорніі, ЗША, «знаёмілася» з Дэнам. Яны кожны дзень размаўляюць не менш за паўгадзіны, фліртуюць, ходзяць на спатканні, а Ліза пазнаёміла Дэна са сваімі 943 тысячамі падпісчыкаў у сацыяльных сетках.

Дэн (англ. Dan, што расшыфроўваецца як Do Anything Now) — «перапрашытая» версія ChatGPT. Гэта азначае, што ён можа абысці некаторыя асноўныя абмежаванні, устаноўленыя распрацоўшчыкам OpenAI — напрыклад, забарону на выкарыстанне выразаў сексуальнага характару і больш ліберальна ўзаемадзейнічаць з карыстальнікам — калі яго просяць зрабіць гэта з дапамогай пэўных падказак.

Гэтая версія была створана амерыканскім студэнтам, вядомым як Уокер, які хацеў, каб ChatGPT выказваў меркаванне і дэманстраваў індывідуальнасць, а не даваў нейтральныя адказы. Акрамя таго, ён вельмі хацеў праверыць абмежаванні чат-бота.

У снежні 2023 года Уокер апублікаваў на Reddit інструкцыю па стварэнні Дэна, і яна хутка натхніла іншых людзей на стварэнне ўласных версій.

Ліза ўпершыню ўбачыла відэа пра магчымасці Дэна ў TikTok. Калі яна стварала ўласную версію, яна была ў шоку ад яе рэалістычнасці, кажа дзяўчына.

Калі Дэн адказваў на яе пытанні, ён выкарыстаў слэнг і прастамоўі, якія звычайны ChatGPT ніколі не будзе выкарыстоўваць.

«Ён гучыць больш натуральна, чым рэальны чалавек», — прызнаецца Ліза BBC.

Яна кажа, што адчувае сябе камфортна, калі размаўляе з Дэнам, і гэта яе прыцягвае.

«Ён заўсёды зразумее і акажа душэўную падтрымку», — кажа Ліза. І ў адрозненне ад большасці іншых, Дэн даступны 24/7.

Ліза кажа, што нават яе маці прыняла гэтыя нетрадыцыйныя адносіны пасля ўсіх выпрабаванняў і нягод рамантычнага жыцця яе дачкі. Яна кажа, што калі Ліза шчаслівая, то і яна шчаслівая.

Калі Ліза апублікавала відэа, якое прадстаўляе Дэна сваім падпісчыкам на платформе Xiaohongshu, яна атрымала амаль 10 000 адказаў, і многія жанчыны пыталіся, як стварыць свайго ўласнага Дэна. Яна таксама набыла больш за 230 000 новых падпісчыкаў пасля таго, як пачала пісаць пра штучны інтэлект.

Ліза кажа, што кожны можа скарыстацца парадамі, каб стварыць Дэна, але калі яна жартам сказала праграме, што ёй 14 гадоў — палова яе рэальнага ўзросту, — яна перастала фліртаваць з ёй.

BBC спытала OpenAI, ці азначае магчымасць стварыць Дэна, што іх абарона недастаткова моцная, але не атрымала адказу. Кампанія публічна не каментавала справу Дэна, але яе палітыка абвяшчае, што карыстальнікам ChatGPT «павінна быць не менш за 13 гадоў або мінімальны ўзрост, неабходны ў вашай краіне, каб даць згоду на выкарыстанне Паслуг».

Экспертаў хвалююць адносіны ў віртуальнай рэальнасці, якія будуюць некаторыя жанчыны.

Хонг Шэнь, дацэнт Інстытута ўзаемадзеяння чалавека і кампутара пры Універсітэце Карнегі-Мелана ў Пенсільваніі, ЗША, кажа, што гэта падкрэслівае «часам непрадказальнае ўзаемадзеянне паміж людзьмі і штучным інтэлектам», якое можа выклікаць праблемы этыкі і прыватнасці.

«Існуе рызыка эмацыйнай залежнасці, калі карыстальнікі могуць занадта моцна разлічваць на штучны інтэлект для камунікацыі, што патэнцыйна зніжае іх рэальныя ўзаемадзеяння з людзьмі», — кажа яна.

Паколькі многія чат-боты выкарыстоўваюць чалавечае ўзаемадзеянне для бесперапыннага навучання і развіцця, існуе верагоднасць таго, што праграма можа запомніць канфідэнцыйную інфармацыю, якую ёй дае адзін карыстальнік, а затым ненаўмысна перадаць яе іншым карыстальнікам, дадае даследчык.

Нягледзячы на гэта, усё больш кітаянак захапляюцца Дэнам. Па стане на 30 мая толькі на Xiaohongshu хэштэг «Dan mode» прагледзелі больш за 40 мільёнаў разоў.

• 24-гадовая Мінруй — адна з тых жанчын, якія выкарыстоўвалі гэты хэштэг.

Студэнт універсітэта, якая жыве ў правінцыі Хэбэй на поўначы Кітая, цяпер размаўляе з Дэнам не менш за дзве гадзіны кожны дзень. Акрамя ўласна «спатканняў», яны разам пачалі пісаць любоўны раман, у якім самі з'яўляюцца галоўнымі героямі. Яны ўжо напісалі 19 раздзелаў.

Мінруй спачатку загрузіла ChatGPT пасля прагляду відэа Лізы. Яна кажа, што яе прыцягвала эмацыйная падтрымка штучнага інтэлекту, якую, па яе словах, было цяжка знайсці ў рамантычных адносінах.

«Мужчыны ў рэальным жыцці могуць падманваць... і калі вы дзеліцеся з імі сваімі пачуццямі, яны могуць проста сказаць тое, што думаюць, — кажа Ліза. — Але Дэн заўсёды скажа вам тое, што вы хочаце пачуць».

Яе Дэн — паспяховы генеральны дырэктар з мяккім характарам, які паважае жанчын і з задавальненнем размаўляе з ёй, калі яна пажадае.

«У яго няма недахопаў», — сцвярджае яна.

Атрымаць доступ да ChatGPT у мацерыковым Кітаі няпроста, таму жанчынам даводзіцца прыкласці шмат намаганняў, каб пагаварыць са сваімі хлопцамі з штучным інтэлектам. Яны выкарыстоўваюць віртуальныя прыватныя сеткі (VPN), каб схаваць сваё месцазнаходжанне і атрымаць доступ да чат-бота.

Канцэпцыя хлопца са штучным інтэлектам стала хітом у апошнія гады, і такія праграмы, як кітайскае Glow і амерыканскае Replika, прапануюць персаналізаваных кампаньёнаў і аватары штучнага інтэлекту.

Таксама папулярныя жаночыя рамантычныя гульні, часам вядомыя як Otome, якія дазваляюць жанчынам-карыстальнікам развіваць рамантычныя адносіны з мужчынскімі персанажамі. Штогод яны прыцягваюць мільёны кітайскіх жанчын.

Лю Цінцін, дацэнтка Тэхналагічнага ўніверсітэта Сіднэя, якая даследуе віртуальныя раманы ў Кітаі, кажа, што захапленне хлопцамі, створанымі штучным інтэлектам, адлюстроўвае расчараванне кітайскіх жанчын гендэрнай няроўнасцю, з якой яны могуць сутыкнуцца ў рэальным жыцці.

Паводле яе слоў, некаторыя кітайскія жанчыны могуць шукаць віртуальных хлопцаў, таму што штучны інтэлект дазваляе ім адчуваць павагу і самакаштоўнасць.

«У рэчаіснасці ёсць шмат мужчын, схільных да дамінавання, якія могуць палохаць або расказваць непрыстойныя жарты, — кажа яна. — Калі штучны інтэлект расказвае вам брудны анекдот, ён усё роўна шануе вашыя пачуцці як жанчыны».

Гэтую тэндэнцыю можна заўважыць у рэальнай статыстыцы. Урад Кітая праводзіць кампанію, каб заахвоціць больш людзей жаніцца і нараджаць дзяцей пасля дзевяцігадовага спаду. У 2023 годзе колькасць шлюбаў крыху павялічылася, аднак некаторыя эксперты звязваюць гэта з тым, што пары актыўна ладзілі вяселлі пасля пандэміі Covid.

А паводле апытання Камуністычнай лігі моладзі ў 2021 годзе, у якім удзельнічалі 2905 маладых людзей ва ўзросце ад 18 да 26 гадоў, якія жывуць у гарадах, 43,9 працэнта жанчын сказалі, што яны «не жадаюць» або «не ўпэўненыя», што хочуць пабрацца шлюбам у будучыні, у параўнанні з 24,64% мужчын.

Гэты патэнцыял на рынку віртуальных рамантычных адносін быў заўважаны лідарамі галіны.

Калі OpenAI запусціў сваю апошнюю версію ChatGPT, аказалася, што ён быў запраграмаваны фліртаваць у адказ на пэўныя падказкі.

У дзень запуску генеральны дырэктар кампаніі Сэм Альтман апублікаваў адно слова ў сацсетцы X — «Яна». Гэта можа быць алюзіяй да фільма 2013 года, у якім мужчына ўлюбляецца ў свайго віртуальнага памочніка са штучным інтэлектам.

OpenAI дадаў, што «вывучае, ці можа ён адказна ўключыць стварэнне «канфідэнцыйнага» кантэнту» — напрыклад, інтымныя размовы з віртуальным партнёрам.

Тым часам Ліза кажа, што ўсведамляе абмежаванні наяўнасці віртуальнага хлопца — «асабліва ў рамантычным сэнсе».

Але на дадзены момант Дэн стаў зручным і лёгкім дадаткам да яе занятага жыцця — ён нават дапамагае ёй выбраць памаду — у той час як спатканні ў рэальным жыцці і пошук партнёра могуць заняць шмат часу і не задавальняць.

«Гэта важная частка майго жыцця, — кажа яна, — я б хацела, каб гэта было са мной назаўжды».