ЦАХАЛ: Калі гэта належыць ХАМАС, мы наносім удар
Прэм'ер-міністр Ізраіля Біньямін Нетаньяху заявіў, што ўсе баевікі ХАМАС будуць знішчаны: «Кожны баявік ХАМАС памрэ. ХАМАС — гэта ІДІЛ. Мы раздавім іх». Што здарылася за ноч ізраільска-палесцінскай вайны?
Дым ад выбуху, выкліканага ізраільскімі авіяўдарамі ў адказ на мяжы паміж Егіптам і Рафахам, сектар Газа, 10 кастрычніка 2023 года. Фота: AP Photo/Hatem Ali, File
Колькасць загінулых у Ізраілі ў выніку атакі ХАМАС дасягнула 1300 чалавек, каля 3300 паранены, паведамляюць мясцовыя СМІ.
Армія абароны Ізраіля яшчэ не прыняла рашэнне пра наземнае ўварванні ў Газу, піша «Reuters» са спасылкай на крыніцы ў ЦАХАЛ. «Але мы рыхтуемся да гэтага», — дадалі там.
Ніводная ракета не была выпушчана ў бок Ізраіля з Газы з 22:00 вечара, адзначае «The Times of Israel». Зацішша можа сведчыць пра тое, што ХАМАС эканоміць свае запасы перад патэнцыйнай наземнай аперацыяй Ізраіля, мяркуе выданне.
ЦАХАЛ: захопленыя ХАМАС ізраільцяне, хутчэй за ўсё, знаходзяцца пад зямлёй
Ізраільскія ўлады лічаць, што захопленыя ХАМАС закладнікі знаходзяцца пад зямлёй, заявіў у інтэрв'ю CNN прэс-сакратар Арміі абароны Ізраіля (ЦАХАЛ) Джонатан Конрыкус.
Раней выказваліся здагадкі, што закладнікі могуць знаходзіцца ў лабірынтах падземных тунэляў на тэрыторыі сектара Газа, якімі карыстаюцца баевікі.
«Розум падказвае, што яны знаходзяцца пад зямлёй, — сказаў Конрыкус. — Розум таксама дыктуе, што ХАМАС, калі ўжо яны планавалі правесці гэтую атаку і ўзяць гэтых людзей у закладнікі, павінен быў загадзя прадумаць месцы, дзе можна схаваць гэтых закладнікаў і засцерагчы іх ад ізраільскай разведкі і намаганняў па іх вызваленні».
Па словах прадстаўніка ЦАХАЛ, сітуацыя з закладнікамі з'яўляецца надзвычай адчувальнай і складанай тэмай. Нягледзячы на тое, што Ізраіль мае досвед вызвалення закладнікаў, ён ніколі не сутыкаўся ні з чым падобным.
Эрдаган хоча дамовіцца пра вызваленне закладнікаў
Прэзідэнт Турцыі Рэджэп Эрдаган пачаў весці перамовы з баевікамі ХАМАС аб вызваленні ізраільскіх закладнікаў, паведамляе «Reuters» са спасылкай на высокапастаўленага турэцкага чыноўніка.
Ён дадаў, што пакуль дакладна невядома, колькі закладнікаў утрымлівае ХАМАС. Па розных ацэнках, каля 150 чалавек, выкрадзеных з Ізраіля. Таксама пакуль незразумела, колькі з іх цывільных, а колькі вайскоўцаў.
Ізраіль наносіць маштабныя ўдары па пазіцыях ХАМАС у Газе
Армія абароны Ізраіля наносіць маштабныя ўдары па аб'ектах групоўкі ХАМАС у сектары Газа, гаворыцца ў паведамленні ЦАХАЛ.
Адначасова палесцінскае Міністэрства аховы здароўя паведаміла, што колькасць загінулых у сектары Газа вырасла да 1200 чалавек — гэта адбылося ў тым ліку праз узмацненне ізраільскіх бамбаванняў.
«Колькасць загінулых узрасла прыкладна да 1200 чалавек, а колькасць параненых — да 5 600», — заявіў прадстаўнік ведамства.
Ізраільская армія наносіць удары па сетцы тунэляў ХАМАС
Армія абароны Ізраіля заяўляе, што наносіць удары па сетцы тунеляў руху ХАМАС у сектары Газа.
«Лічыце, што ў сектары Газа ёсць адзін пласт для цывільных асоб і адзін пласт для ХАМАС», – заявіў прэс-сакратар ЦАХАЛ Джонатан Конрыкус у відэазвароце, апублікаваным у сацсетцы X.
Паводле яго слоў, тунэлі, пабудаваныя з моманту прыходу ХАМАС да ўлады ў Газе ў 2007 годзе, выкарыстоўваюцца для транспарціроўкі грузаў, а таксама для планавання і правядзення аперацый супраць Ізраіля.
«Тут значна больш, чым здаецца на першы погляд. Ізраільскія ВПС наносяць удары па многіх раёнах Газы. Мы ў першую чаргу наносім удары па камандзірах, вышэйшых кіраўніках ХАМАС ва ўсіх эшалонах улады», — сказаў ён.
«Што б гэта ні было, калі гэта належыць ХАМАС, мы наносім удар», — дадаў прадстаўнік ЦАХАЛ.
ХАМАС заяўляе, што ў выніку ізраільскіх удараў у Газе загінулі 1203 палесцінцаў
Міністэрства аховы здароўя ХАМАС паведамляе, што 1203 палесцінцаў былі забіты і яшчэ 5769 былі паранены ў выніку ізраільскіх авіяўдараў у сектары Газа.
Сілы абароны Ізраіля заявілі, што забілі каля 1500 палесцінскіх тэрарыстаў на ізраільскай тэрыторыі.
Паводле ВВС, www.timesofisrael.com, meduza.io