Апытанне: большасць еўрапейцаў гатовыя абараняць Украіну
Прэзідэнт Расіі Уладзімір Пуцін можа быць здзіўлены тым, што большасць еўрапейцаў гатовыя абараняць Украіну. Апытанне ECFR паказала, што 60 працэнтаў еўрапейцаў падтрымліваюць ідэю выступлення Еўрасаюза ці нават NATO на абарону Украіны ў выпадку ўварвання з боку Расіі, піша www.dw.com.
Украінскія памежнікі ў Харкаўскай вобласці
Больш за палову жыхароў Еўропы падтрымліваюць ідэю таго, што Еўрасаюз ці NATO будуць выступаць у абарону Украіны ў выпадку ўварвання з боку Расіі. Гэта вынікае з апытання, праведзенага Еўрапейскім саветам па міжнароднай палітыцы (ECFR) у сямі краінах, піша ў сераду, 9 лютага, газета Süddeutsche Zeitung, у распараджэнні якой аказаліся вынікі даследавання.
У цэлым такі пункт гледжання выказалі 60 працэнтаў рэспандэнтаў. Каля паловы ўскладаюць абавязак абароны Украіны на ЗША, Германію ці Францыю. Пры гэтым апытаныя ў Германіі, Італіі, Польшчы і Румыніі аддалі перавагу адказу на агрэсію на ўзроўні NATO, а ў Фінляндыі, Францыі і Швецыі — адказу Еўрасаюза.
Прэзідэнт Расіі Уладзімір Пуцін можа быць здзіўлены тым, што большасць еўрапейцаў гатовыя абараняць Украіну, адзначаюць эксперты ECFR.
Аднак толькі ў Польшчы большасць жыхароў (65 працэнтаў) мяркуюць, што іх уласнай краіне варта ўмяшацца ў выпадку эскалацыі канфлікту. У Швецыі з такой пазіцыяй згодныя 43 працэнты апытаных, у Германіі — 37 працэнтаў, у Фінляндыі — толькі кожны пяты.
Хто гатовы прыняць рост цэн на энерганосьбіты і прыток бежанцаў?
Паводле апытання, жыхары Германіі і Францыі менш за ўсё гатовыя на гэта. Аднак могуць пагадзіцца з магчымымі наступствамі такой салідарнасці для эканомікі — у тым ліку, з высокімі цэнамі на энерганосьбіты, прытокам бежанцаў з Украіны і пагрозай фізічнага нападу або кібератакамі з боку Расіі. У той жа час сярод рэспандэнтаў у Польшчы, Румыніі і Швецыі падобная перспектыва выклікае менш страхаў.
У магчымасць нападу Расіі на Украіну ў 2022 годзе верыць больш за палову насельніцтва Польшчы (73%), Румыніі (62%), Швецыі (55%), Германіі (52%), Італіі (52%) і Францыі (51%). І толькі ў Фінляндыі сацыёлагі не змаглі выявіць яўнай большасці, што верыць, нібы Расія можа ўварвацца ва Украіну ў гэтым годзе.