«Уседзець на двух крэслах нельга». У Крыме адказалі Лукашэнку наконт прызнання паўвострава расійскім

Словы Аляксандра Лукашэнкі аб тым, што Мінск прызнае Крым і Севастопаль часткай Расіі, толькі «калі апошні алігарх у Расіі прызнае Крым і пачне пастаўляць туды прадукцыю», «не наблізяць Лукашэнку да Еўропы», распавёў дэпутат Дзярждумы ад Крыма Руслан Бальбек. У гутарцы з «Газетой.Ru» ён растлумачыў, што ў Лукашэнкі не атрымаецца «ўседзець на двух крэслах».

На думку парламентарыя, такая пазіцыя нявыгадная для Беларусі і можа выклікаць толькі «здзіўленне расіян ад такіх паводзін саюзніка».

«Прэзідэнт Беларусі ўжо нелігітымны ў вачах заходняй супольнасці — ён такой заявай спадзяецца прыбраць гэты бар'ер? Уседзець на двух крэслах не атрымаецца, а вось абразіць расіян ужо атрымалася», — сказаў парламентарый.

Раней Лукашэнка ў эфіры тэлеканала «Беларусь 1» распавёў, калі беларускі бок прызнае Рэспубліку Крым і Севастопаль часткай Расіі.

«Калі апошні алігарх у Расіі прызнае Крым і пачне пастаўляць туды прадукцыю — за мной справа не заржавее», — заявіў Лукашэнка.

Ён таксама адзначыў, што ад прызнання Крыма расійскім яго абмяжоўвае, як мяркуецца, «Будапешцкі мемарандум» (Лукашэнка назваў яго «дэкларацыяй») аб ядзерным раззбраенні, у якім была замацавана адмова Беларусі ад ядзернай зброі і які дэ-факта быў абвешчаны яшчэ ў 1993 годзе.