Tages-Anzeiger: «Лукашэнка запусціў у Беларусі спіраль гвалту, якую, верагодна, сам не можа спыніць»

Швейцарская газета Tages-Anzeiger піша, што Еўрапейскі Саюз павінен заняць больш рашучую пазіцыю ў дачыненні да дыктатуры ў Беларусі.

«Хутка Каляды, а дыктатар усё яшчэ тут. Улетку толькі ненадоўга ўзнікла надзея, што Лукашэнка, нарэшце, сыдзе. Яго становішча было вельмі адчайным, ён здаваўся клапатлівым, амаль вар'ятам, са сваімі жудаснымі пагрозамі і з'яўленнем з аўтаматам Калашнікава. З тых часоў прайшло некалькі месяцаў, і вонкава, здаецца, змянілася мала. Кожны тыдзень за пратэстамі ідуць сотні арыштаў, гаворка зноў ідзе пра стральбу, збіццё, параненых і забітых», — піша журналістка швейцарскага выдання Tages-Anzeiger Зільке Бігалке.

«Сёння сітуацыя яшчэ больш недапушчальная, чым была да прэзідэнцкіх выбараў. З аднаго боку, гэта звязана са спіраллю гвалту, якую Лукашэнка, верагодна, зараз і сам не можа спыніць. Ён аддаў свой лёс у рукі апарата бяспекі і прызначыў на важныя пасады больш людзей з войска і спецслужбаў. Яны адказваюць за парушэнні правоў чалавека ў апошнія месяцы і хочуць перашкодзіць пераменам хоць бы для таго, каб потым не быць прыцягнутымі да адказнасці. Прорва паміж рэжымам і насельніцтвам становіцца ўсё глыбей: большасць хоча правядзення новых выбараў. Яна патрабуе пакласці канец гвалту і пакараць вінаватых. Менавіта гэта Лукашэнка цяпер не можа даць людзям», — гаворыцца ў артыкуле.

«Замест гэтага яго рэпрэсіі сталі больш прадуманымі і эфектыўнымі. (...) Большасць міжнародных журналістаў з’ехалі. Лукашэнка закрыў межы краіны, многія беларусы больш не могуць з краіны выехаць. Афіцыйна гэта было зроблена з-за пандэміі, якая на самай справе ніколі не цікавіла Лукашэнку», — адзначае аўтарка артыкула.

«Брусэль, вагаючыся, увёў некалькі санкцый, не жадаючы ў першую чаргу раздражняць Маскву, якая мае ў Беларусі значна большы ўплыў, чым ЕС. Вядома, першапачаткова стрыманая пазіцыя была засцерагальнай, беларуская апазіцыя сама аб гэтым прасіла. (...) Але цяпер чуваць, што яна просіць ЕС аб дапамозе».

«(...) Еўрасаюз мог бы дзейнічаць больш рашуча, увесці санкцыі супраць большай колькасці кампаній і бізнесоўцаў, якія падтрымліваюць Лукашэнку. Ён мог бы аказаць больш маштабную дапамогу праваабаронцам і грамадзянскім групам, больш выразна паказаць праціўнікам рэжыму, на чыім ён баку. Паралізуючае пачуццё бяссілля не павінна застацца ні ў дварах Мінска, ні ў Брусэлі», — гаворыцца ў публікацыі.

Паводле inopressa.ru, пераклад НЧ