Сакрэтны дакумент Крамля: Расія хоча захапіць Беларусь да 2030 года

Масква, відаць, плануе да 2030 года таемны захоп Беларусі. Прынамсі, пра гэта сведчыць дакумент Адміністрацыі прэзідэнта Расіі, які атрымалі журналісты.

Як распавядае нямецкае выданне «Focus.de», журналісты атрымалі доступ да ўнутранага дакумента расійскіх улад пад назвай «Стратэгічныя мэты Расійскай Федэрацыі ў Беларусі». Згодна з ім, Расія збіраецца да 2030 года акупаваць Беларусь. У расследаванні ўдзельнічаў кансорцыум журналістаў з «Süddeutsche Zeitung», «WDR», «NDR», «Yahoo News», «Delfi Eesti», цэнтра «Дасье», «Expressen», «Independent», «Frontstory», Беларускага расследавальніцкага цэнтра і «VSquare».

Дакумент датуецца летам 2021 года і змяшчае 17 старонак. У ім пералічаны палітычныя, абаронныя, гандлёвыя і сацыяльныя мэты расійскіх улад у Беларусі. Яны падзелены на тры катэгорыі — кароткатэрміновыя (да 2022 года), сярэднетэрміновыя (да 2025 года) і далёкатэрміновыя (2030 год).

У дакуменце разгледжана ўсё, што звязана з аб'яднаннем краін, сцвярджаюць журналісты. Напрыклад, у ім гаворыцца, што рэформа Канстытуцыі, якую прынялі ў Беларусі на так званым рэферэндуме ў лютым 2022 года, павінна быць завершана ў адпаведнасці з расійскімі інтарэсамі, а законы Беларусі мусяць быць «гарманізаваны» з законамі РФ.

Яшчэ адной мэтай з'яўляецца «забеспячэнне пераважнага ўплыву Расійскай Федэрацыі ў галіне сацыяльнай палітыкі, гандлю, эканомікі, навукі, адукацыі і культуры».

Валерый Кавалеўскі: менавіта Лукашэнка пагражае незалежнасці Беларусі

Акрамя гэтага, расійскія ўлады збіраюцца спрасціць працэдуру выдачы расійскіх пашпартоў беларускім грамадзянам «з мэтай стварэння праслойкі расійцаў, зацікаўленых у інтэграцыі, і бізнес-колаў, арыентаваных на расійскі рынак» — такую стратэгію яны выкарыстоўвалі ў Паўднёвай Асеціі, Абхазіі, а таксама ў акупаванай частцы Украіны. Таксама да 2030 года плануецца адкрыць у Беларусі пункты здачы АДЭ (ЕГЭ).

Знешнія эксперты, якія па просьбе журналістаў таксама вывучылі дакумент, лічаць яго сапраўдным. «Па сваёй знешняй форме дакумент нагадвае стандартны дакумент расійскай бюракратыі або палітычнага кіравання», — сказаў намеснік дырэктара Стакгольмскага Цэнтра ўсходнееўрапейскіх даследаванняў (SCEEUS) Марцін Краг.

Такое ж меркаванне выказалі прадстаўнікі заходніх спецслужбаў, якім журналісты паказалі дакумент. «Змест дакумента абсалютна праўдападобны і адпавядае таму, што мы таксама бачым», — пракаментаваў супрацоўнік выведкі, які не пажадаў называцца. Эксперты адзначылі, што стратэгічны дакумент варта разглядаць як частку больш буйнога плана Пуціна па стварэнні новай Вялікай Расійскай імперыі.

«Мэты Расіі ў дачыненні да Беларусі тыя ж, што і ў дачыненні да Украіны. Толькі ў Беларусі РФ разлічвае на прымус, а не на вайну. Яе канчатковай мэтай па-ранейшаму з'яўляецца масавая інкарпарацыя», — заявіў Майкл Карпентэр, амбасадар ЗША ў Арганізацыі па бяспецы і супрацоўніцтве ў Еўропе.

У матэрыяле таксама прыводзяцца словы дарадцы Святланы Ціханоўскай Франака Вячоркі, які лічыць, што «беларускі план [Масквы] — гэта план, які таксама можна ўжыць да Казахстана, Арменіі, Малдовы».