«Захоўваем інтрыгу». У «B*POL» патлумачылі, чаму не апублікавалі відэа з момантам дыверсіі ў Мачулішчах

У чацвер днём, 2 сакавіка, ініцыятыва «B*POL» падзялілася з журналістамі відэазапісам, на якім дроны праводзілі разведку над аэрадромам у Мачулішчах. Чаканага моманту атакі на расійскі самалёт А-50 на ім не было. «Л*стэрка» спытала ў кіраўніка ініцыятывы былых сілавікоў Аляксандра Азарава, ці ёсць у іх доказы дыверсіі.

Фота: «Ваяр»

— Відэа, якое апублікаваў «B*POL», — гэта відэа выведкі, а не самога моманту дыверсіі. Узнікае пытанне, ці ёсць у вас доказ таго, што выбухі былі? Ці ёсць відэа гэтага моманту і фота ці відэа наступстваў? Калі так, то чаму вы іх не апублікавалі?

— Мы пакуль захоўваем інтрыгу. І на гэта пытанне ёсць у нас адказ: усяму свой час.

— Але чаму?

— Таму што. Так мы вырашылі. Тое, што там [у Мачулішчах] нешта было, гэта відаць з першых самых дзён. Нават калі б мы не заяўлялі. Узмацненне на мяжы, узброеныя патрулі, чулі выбухі — самыя першыя былі паведамленні ад людзей, якія ў Мачулішчах жывуць.

Потым вось вам відэа, што там дроны лёталі, садзіліся на дах [самалёта]. І няма ніякай аховы. Лукашэнка і дзяржаўныя СМІ нічога не каментавалі тры дні цэлыя — гэта само за сябе кажа. Праводзілі пасяджэнні сілавікоў у панядзелак. Лукашэнка ўсіх збіраў і крычаў, што трэба навесці «жэстачайшую» дысцыпліну.

А расійскія тэлеграм-каналы ваенныя далі, па-мойму, у аўторак інфармацыю, што там выбухі зрабілі дроны. Расійцы першыя пра гэта паведамілі.

Таксама яны [сілавікі] шукаюць чалавека за асабліва цяжкае злачынства ў Мачулішчах, размешчанае фота. Паводле аператыўных зводак, пра якія нам паведамілі знутры, знайшлі сумку з двума пультамі ад двух дронаў, акулярамі і запчасткамі ад дронаў. Усё Міністэрства ўнутраных спраў ведае, што быў падрыў на самалёце, і шукае тых, хто гэта здзейсніў. Усё міністэрства на вушах.

— Гэта вам стала вядома ад крыніц унутры міністэрства?

— Так, я тэлефанаваў тым, хто яшчэ служыць. Яны сказалі, што ўсе ведаюць, што там быў падрыў. І ўсе кажуць: што за разгільдзяйства, як такое маглі дапусціць!

— Але сёння па дзяржТБ паказалі, што самалёт узляцеў і ляціць…

— Да пытання, як ён ляціць. Падрывы былі гэтай «талеркі» (абцякальнік РЛС — тая самая «талерка» зверху самалёта. — заўв. рэд.) і, па-мойму, у пярэдняй частцы самалёта. Чаму самалёт можа ляцець? Крылы, дзе паліва знаходзіцца, ніхто не падрываў і не чапаў, рухавікі — таксама на крылах. І іх таксама не чапалі. Гэта значыць, іх завесці можна.

Я думаю, што яны тры дні маўчалі і нічога не паказвалі, бо тры дні, напэўна, чынілі абсталяванне, каб ён мог узляцець. І вось на чацвёрты дзень ён узляцеў. І як паведаміў Матолька, паляцеў у Таганрог на авіязавод для рамонту.

— Тут інфармацыя ёсць з двух бакоў. З аднаго боку, дзяржСМІ заявілі, што самалёт узляцеў для баявога дзяжурства і абляцеў межы Беларусі. З іншага, тэлеграм-канал «Б*ларускі Гаюн» кажа, што самалёт пакінуў паветраную прастору Беларусі.

— Дык мы каму верым, сваім ці чужым?

У гісторыі палітычнага супрацьстаяння ў Беларусі адкрываецца новая старонка?

— Калі б можна было адсачыць шлях самалёта па праграмах тыпу «Flightradar24», то мы б маглі праверыць гэтую інфармацыю самастойна і не стаяла б пытанне веры. Але А-50 не фіксуецца ў падобных сэрвісах, таму застаецца супярэчнасць.

— Тут у Матолькі трэба будзе ўдакладняць. Магчыма, ён апублікуе інфармацыю аб прызямленні. Я дакладна не ведаю, як ён гэта адсочвае.

— У паведамленні «B*POL» аб падрабязнасцях дыверсіі была фраза, што самалёт «ужо дакладна нікуды не паляціць». А ён узлятае.

— Мы ж не бачылі на свае вочы, не стаялі і не маглі праверыць яго пашкоджанні. Я, вядома, спадзяваўся, што ён не ўзляціць, але бачыце…

— Вы дапускаеце, што вас маглі падмануць?

— Не, не дапускаю. Ні ў якім разе не дапускаю.

— Як вы правяралі гэтую інфармацыю? Даведваліся ў работнікаў аэрадрома, напрыклад?

— Мы працуем з людзьмі. Але пра гэта мы нічога казаць не будзем.

— Калі ў такім выпадку чакаць відэа з момантам дыверсіі?

— Ну вось калі будзе, тады пабачыце. Сэнс дыверсіі быў у пашкоджанні абсталявання, а не самалёта ў цэлым, каб ён не мог узляцець. Гэты самалёт вельмі вялікі: каб яго пашкодзіць, трэба, я не ведаю, з мінамёта або гарматы страляць. А маленькія дроны, якія прадаюцца ў крамах, не могуць яго моцна пашкодзіць.