З вязьняў на Акрэсьціна бяруць амаль у тры разы больш грошай за харчаванне, чым марнуюць

Сумна знакаміты ізалятар перавялі на самаакуупнасць? 

На электроннай пляцоўцы Беларускай універсальнай таварнай біржы з'явілася аб'ява аб тым, што Цэнтр ізаляцыі правапарушальнікаў і ізалятар часовага ўтрымання ГУУС Мінгарвыканкама (1-ы завулак Акрэсціна) закупляе паслугі па харчаванні затрыманых на сакавік-снежань 2021 года. Арыенціровачная сума — 275 тысяч рублёў, піша «Village».

У апісанні закупкі сказана, што ў суткі на аднаго чалавека кошт харчавання не павінен перавышаць 3 рублёў 69 капеек (без уліку гандлёвай нацэнкі). Нацэнка — максімум 40% з улікам дастаўкі харчавання ў ізалятар. У 2020 годзе ліміт кошту на чалавека (таксама без нацэнкі) складаў 3 рублі 44 капейкі.

Дастаўка гарачага харчавання павінна ажыццяўляцца тры разы на дзень: сняданак — не пазней 7:10, абед — не пазней 13:00, вячэра — не пазней за 17:00.

Калі агульную суму — 275 тысяч рублёў — падзяліць на 10 месяцаў, то выходзіць 27 500 рублёў у месяц. Калі ўзяць максімальную гандлёвую надбаўку 40%, то выходзіць, што адзін дзень харчавання аднаго зняволенага на Акрэсціна ў 2021 годзе абыдзецца дзяржаве максімум у 5,2 рубля. На 27 500 можна пракарміць каля 5 300 чалавек у месяц.

Адседзеўшы на «сутках», беларусам даводзіцца аплачваць рахункі за харчаванне ў ізалятарах: 0,5 базавай велічыні за кожныя суткі ўтрымання ў ІЧУ (ЦІП) і 2,5 базавай велічыні за знаходжанні ў спецыялізаваным ізалятары. Базавая велічыня з 1 студзеня 2021 года — 29 рублёў, гэта значыць адзін дзень харчавання на Акрэсціна беларусу сёлета будзе каштаваць 14,5 рублёў — амаль у тры разы больш, чым выдаткоўвае дзяржава.