Верасень пабіў рэкорды па колькасці кінутых і прыстроеных у добрыя рукі жывёл

Верасень адзначыўся для «Фаўны горада» самай вялікай з пачатку года колькасцю котак і сабак, якіх туды здало насельніцтва. Пра гэта Мінск-Навінам паведаміла дырэктар прадпрыемства Тамара Царыкоўская, піша «Наша Ніва».

У «Фаўне горада» мяркуюць, што ў кастрычніку сюды таксама прывязуць нямала «хвастоў». Увосень актыўнасць «гаспадароў», якія насамрэч так і не здолелі імі стаць, заўсёды павышаецца: яны імкнуцца прыстроіць перад зімой непатрэбных гадаванцаў. Выбіраюць для гэтага часам вельмі хітрыя спосабы. Работнікі прадпрыемства перыядычна знаходзяць на парозе пакеты і скрынкі з чатырохногімі, іншы раз нават упрыгожаныя банцікамі і цыдулкамі аб тым, якая выдатная жывёла ўнутры.
— За верасень было адлоўлена 69 катоў, а насельніцтва здало 40 — у разы больш — чым у папярэднія месяцы, — прыводзіць даныя Царыкоўская.
З сабакамі сітуацыя аналагічная: у першы месяц восені жыхары пакінулі на «Фаўне горада» 31 сабаку, хоць у папярэднія месяцы такім чынам сюды траплялі ад 6 да 16 сабак штомесяц.
Ёсць і пазітыўная статыстыка. У верасні з прадпрыемства ў новыя дамы або на ператрымкі з'ехалі 99 сабак і 117 катоў, што таксама пакуль рэкорд года.
Па стане на 12 кастрычніка ў клетках і вальерах «Фаўны горада» знаходзяцца 86 сабак і 36 катоў. І ім патрэбныя дом і клапатлівыя гаспадары. Жадаючым забраць з прадпрыемства пухнатага сябра варта мець пры сабе пашпарт, ланцужок і павадок для сабак, пераноску ці іншы кантэйнер для транспарціроўкі кошак, кацянят і шчанюкоў.
На прадпрыемстве дзейнічаюць абмежаванні па наведванні ў сувязі каронавірусам. Так, па чацвяргах тут санітарны дзень і наведвальнікаў не прымаюць. У астатнія дні з 14:00 да 19:00 можна прыязджаць і забіраць сваіх жывёл, якія трапілі ў адлоў, з 17:30 да 19:00-выбіраць сабе новага сябра. Важна памятаць аб захаванні масачнага рэжыму і сацыяльнага дыстанцыяваньня.
У «Фаўны горада» ёсць уласны Telegram-канал, дзе публікуюць фатаграфіі хатніх жывёл, якія паступаюць туды, і інфармацыю пра іх. Гэты канал таксама можа быць карысны ў выбары гадаванца.
Таксама нагадваем, што «Новы Час» мае адмысловую рубрыку «Выратуйце жыццё!», дзе вы можаце выбраць сабе пухнатага сябра.