У Мінску расце колькасць шматдзетных сямей

Колькасць шматдзетных сем'яў у Мінску з 2012 года павялічылася  на 56,7%. Пра гэта паведаміла журналістам старшыня камітэта па працы, занятасцi i сацыяльнай абароне Мінгарвыканкама Жанна Рамановіч.



"Колькасць шматдзетных сем'яў у Мінску пастаянна павялічваецца. Зараз іх у сталіцы налічваецца 9 тыс. 912, у іх выхоўваецца 31 тыс. 438 дзяцей. Разам з тым, больш за 70 % сем'яў маюць адно дзіця. Мяркую, што, дзякуючы ўзмацненню мер дзяржпадтрымкі сем'яў, многія мінчане адважваюцца на нараджэнне другога і наступных дзяцей ", - лічыць Жанна Рамановіч.

Яна адзначыла, што шматдзетныя сем'і ўжо звяртаюцца за прызначэннем сямейнага капіталу. "Парадак прызначэння сямейнага капіталу зацверджаны, і сям'і ўжо могуць звярнуцца па гэтым пытанні. Для прызначэння капіталу на працягу пяці дзён будуць запытаны неабходныя дакументы, якія пацвярджаюць, што сям'я мае статус шматдзетнай і ніхто з бацькоў не пазбаўлены бацькоўскіх правоў. Затым на працягу месяца будзе прымацца рашэнне аб прызначэнні або адмове ў прызначэнні сямейнага капіталу, на працягу наступных пяці дзён пасля прыняцця рашэння сям'і будзе накіравана паведамленне. Атрымаўшы яго, варта звярнуцца ў падраздзяленне ААТ "АСБ Беларусбанк" па месцы прызначэння сямейнага капіталу з заявай аб адкрыцці дэпазітнага рахунку ", - патлумачыла старшыня камітэта па працы, занятасці і сацабароне.

Сямейны капітал - гэта безнаяўныя грашовыя сродкі ў суме  10 тысяч, якія выдаюць сем'ям для выкарыстання ў Беларусі ў поўным аб'ёме або па частках у безнаяўным парадку. Гэтыя грошы можна будзе выкарыстоўваць па адным або некалькіх напрамках: паляпшэнне жыллёвых умоў; атрыманне адукацыі; атрыманне паслуг у сферы сацыяльнага абслугоўвання, аховы здароўя; фарміраванне назапашвальнай (дадатковай) пенсіі маці (мачахі) у поўнай сям'і, аднаго з бацькоў у няпоўнай сям'і.