У вёсцы пад Брэстам спілавалі старажытны дуб: вяскоўцы абураюцца

У вёсцы Булькава Брэсцкай вобласці спілавалі векавы дуб, які паводле афіцыйнай версіі аварыйны. Вяскоўцы лічаць, што ён камусьці «спадабаўся».

Дуб-сусед, які, мяркуючы па кроне, крыху маладзейшы, таксама павінны былі прыбраць. Але вяскоўцы абурыліся, і ў выніку работнікі ЖКГ яго толькі падчысцілі.
У той дзень, калі побач з дубам з'явіліся рабочыя Жабінкаўскага ЖКГ і пачалі спілоўваць сухія галінкі, мясцовыя жыхары нават узрадаваліся: маўляў, прыбяруць лішняе і векавому дрэву будзе лягчэй. А ўвечары людзі даведаліся, што дуба больш няма. Пра яго цяпер нагадвае толькі пень, які тырчыць з зямлі.
«Здаровае дрэва, але ў яго не раз трапляла маланка, яно было пашкоджана. Але гэта не перашкаджала яму расці. Можна сказаць, ён нас заўсёды выратоўваў, калі былі нейкія буры або што, ён на сябе заўсёды ўсё прымаў. У іншай вёсцы можна пачуць: была бура, трапіла маланка ў дом, згарэў дом. А нас ратаваў дуб. Ён велізарны, колькі гадоў дакладна — не вядома, але больш за сто», — распавядаюць людзі.

Яны кажуць, што другі дуб, які, мяркуючы па кроне, крыху маладзейшы, таксама павінны былі прыбраць. Але вяскоўцы абурыліся, і ў выніку работнікі ЖКГ яго толькі падчысцілі.
«Сказалі, што яго прызналі небяспечным для жыхароў і ёсць дакументы, каб яго спілаваць. І другі — таксама спілаваць, таму што небяспечны. А чым ён небяспечны, калі паглядзець корань — здаровы векавой дуб?» — абураюцца вяскоўцы.
Старшыня Ракітніцкага сельсавета Валерый Андраюк тлумачыць, што падчас выязнога прыёму грамадзян да прадстаўнікоў райвыканкама звярнуліся жыхары вёскі Булькава, якія заявілі, што дуб аварыйны, стаіць на павароце дарогі, а магутныя галінкі перашкаджаюць кіроўцам.
«Было дадзена даручэнне сельсавету правесці абследаванне і па неабходнасці прыняць меры. Прыязджала спецыяліст-эколаг. Дала заключэнне, што ён небяспечны. Дуб быў сухі, у яго ўвесь час маланка ударала. Плюс ён на перакрыжаванні. На падставе заключэння эколага мы далі заяўку ў спецыялізаваную арганізацыю, і яны яго зрэзалі. Куды яны яго забралі — на дровы ці куды, я не ведаю», — кажа старшыня сельсавета.
Паводле яго слоў, другі дуб таксама сухаваты, заключэнне, што ён небяспечны, ёсць, і на яго, але даць каманду рэзаць дрэва старшыня пакуль не вырашаецца.
«Напэўна, пакуль што яго чапаць не будзем. Ужо і з інспекцыі аховы прыроды прыязджалі, паглядзелі, што быццам ён будзе стаяць», — дадае Валерый Андраюк.
Начальнік Жабінкаўскай раённай інспекцыі прыродных рэсурсаў і аховы навакольнага асяроддзя Сяргей Шык тлумачыць, што ў той дзень, калі спілавалі дуб у Булькава, яму было тэлефанаванне-скарга.
«Але я ведаў, што дакументы ў сельсавета на два дубы на руках. Без заключэння экалагічнай службы, а ў нас у раёне эколаг знаходзіцца ў ЖКГ, ніхто не мае права да дрэва нават дакранацца. Вось яны спілавалі яго, а другое — тут ужо я ўмяшаўся. Першае дрэва было пашкоджана, ўяўляла небяспеку для людзей. Другое таксама сухое, але я думаю, гэты дуб яшчэ перастаіць нас з вамі. Таму было сказана абрэзаць сухія галінкі і на гэтым усё пакінуць», — распавядае Сяргей Шык.
На пытанне аб тым, ці нельга было на першым дубе абмежавацца абразаннем, начальнік інспекцыі адказвае, што працавала камісія, якая палічыла, што абрэзаць немагчыма.
«Па карчы, які застаўся, сапраўды не скажаш, што дрэва дрэннае. А вось ад удару маланкі ён быў увесь разбураны. Таму і прыбралі. А людзі няхай маланкаадводы ставяць. Не дай бог, хто-небудзь стаяць пад ім будзе, а там жа галінкі магутныя, хто будзе вінаваты? Сельсавет. Таму што не прынялі меры. Таму той дуб яны прыбралі. Пра другі нават гутаркі няма — без нас яго ніхто не кране», — падкрэслівае начальнік раённай прыродааховы.
Эколаг Жабінкаўскага ЖКГ Ірына Кавальская, якая выдавала заключэнне, тлумачыць, што акрамя сухіх абламаных галінак, дуб быў трохі трэснуты:
«У законе пералічаны прычыны, калі дрэва прызнаецца аварыйным. Усё гэта на падставе візуальнага агляду. Наша арганізацыя спілавала на падставе заявы сельсавета. Другое дрэва яшчэ можа стаяць».
А што ж са спілаваным дубам?

Выконваючы абавязкі дырэктара Жабінкаўскага ЖКГ Аляксандр Ганчук сказаў, што дрэва пойдзе на дровы. Сітуацыю ў Булькава ён характарызуе як канфлікт інтарэсаў: адным дуб перашкаджаў, а другія цяпер абураюцца.
«Я бачыў гэты дуб, яго прывозілі на тэрыторыю да нас. Гэта не тое, што 6 або 10 метраў і роўны ствол у паўметра або метр таўшчынёй, які сапраўды можна было пусціць на, скажам, мэблю. Я так разумею, што ён сапраўды стары быў. Таму што, нават калі сельсавет звяртаецца, мы не пілуем здаровыя дрэвы», — рэзюмуе кіраўнік ЖКГ.
b-g.by