У Курапатах ноч была спакойная. Прараб заявіў, што сёння будаўнікі не адновяць працу
Каля 30 чалавек начавалі ў лагеры ўдзельнікаў пікету пратэсту супраць будаўніцтва офіснага цэнтру ў ахоўнай зоне мемарыялу Курапаты, што ў мінскім мікрараёне Зялёны Луг.
8.50 — Абаронцы Курапатаў зайшлі на будаўнічую пляцоўку.
8.35 Алесь Бяляцкі ў гутарцы з карэспандэнткай Свабоды параўноўвае грамадскія пратэсты апошняга часу з сітуацыяй канца 1980-х гадоў:
«Грамадская атмасфера апошняга году, апошніх месяцаў мне нагадвае тое, што ў нас было ў канцы 80-х, калі ўзровень страху ў грамадстве рэзка пачаў зніжацца. Паглыбіліся эканамічныя праблемы — і людзі проста пачалі не баяцца гэтага ціску ўладаў, адкрыта выказвацца супраць іх. Усё гэта сплялося разам: і дэмакратычныя пратэсты, і сацыяльныя».
8.30. На раніцу ў лагеры прысутнічаюць каля 50 пратэстоўцаў, у іх ліку Алесь Бяляцкі, Зміцер Дашкевіч, Павал Севярынец, Уладзімер Някляеў. Таксама на будаўнічай стаяць людзі ў цывільным, якія не далучаюцца да пратэсту, але і не вядуць аператыўныя здымкі, а проста назіраюць.
Севярынец заявіў, што, нягледзячы на прыпыненне будоўлі, пратэстоўцы застаюцца, бо «наш лозунг — давярай, ды правярай»: яны сочаць, каб будоўлю не аднавілі.
Два будаўнікі пагутарылі з карэспандэнтам "Радыё Свабода", але прасілі не называць іх імёнаў. Адзін з іх кажа:
«Мы фактычна закладнікі сітуацыі. З аднаго боку, на нас цісне кіраўніцтва, з іншага боку ёсць маральны аспект. Непрыемна, калі вакол стаяць крыжы, а пад імі даводзіцца біцца».
Мужчына кажа, што будаўнікі разумеюць пратэстоўцаў, але просяць разумець і іх: калі б мелі іншую працу, адмовіліся б ад гэтай, ды іншай працы няма.
Аргкамітэт абароны Курапатаў мае сабрацца сёння а 13-й гадзіне на Сядзібе БНФ (Менск, вул. Чарнышэўскага, 3-39). Мясцовыя жыхары збіраюцца 1 сакавіка пайсці на прыём да старшыні Мінгарвыканкаму Андрэя Шораца.
Ноч прайшла спакойна
Ажыўленне пачалося а палове на восьмую раніцы, калі на агароджаную пляцоўку пачалі падыходзіць будаўнікі. Пікетоўцы спрабавалі іх не дапусціць на аб’ект, але ўсё ж некалькі будаўнікоў прайшлі.
Пратэстоўцы напружана чакаюць будаўнічую тэхніку, зьбіраюцца замінаць яе праезду.
А 7.45 з загародкі выйшлі два будаўнікі з рэчамі, яны сышлі з абʼекта, пратэстоўцы віталі іх выхад воплескамі. Зьміцер Дашкевіч і Павал Севярынец гутараць з прарабам будаўнікоў.
7.55. Па выніках перамоваў прараб заявіў, што сёння будаўнікі працаваць не будуць. Прараб асабіста пацьвердзіў "Радыё Свабода", што ён гутарыў са сваім кіраўніцтвам і было вырашана, што ў такіх умовах будаўнічыя працы сёння аднаўляцца не будуць.
