У Гродне затрымалі яшчэ аднаго актывіста — Сяргея Верамеенку

Грамадскага актывіста і сябра БХД з Гродна Сяргея Верамеенку каля 11 гадзін раніцы затрымалі міліцыянты.

Сяргей Верамеенка здымаў сваё затрыманне і вёў відэатрансляцыю ў сваім фэйсбуку.

Падрабязнасці затрымання «Радыё Рацыя» распавяла жонка актывіста, Вольга Верамеенка:

— Мы выйшлі дзесьці каля 11-й з хаты. Збіраліся ў краму, выклікалі таксоўку. Мы стаялі ў двары і заўважылі белы бус 77-98, зразумелі, што нас ужо чакаюць. Калі мы сказалі таксісту развярнуцца, яны сталі пад’язджаць. Мы на камеру адразу пачалі здымаць. Выйшлі чатыры хлопцы ў цывільным, адзін з іх дастаў пасведчанне, прадставіўся. Яны сказалі, што ў дачыненні да Сержука вядзецца адміністрацыйная справа за ўдзел у несанкцыянаваным мерапрыемстве 15 снежня. Я спыталася, чаму не прыслалі ніякіх дакуменнтаў, яны нічога не адказалі. І сказалі, што трэба праехаць. Спыталіся, куды, яны адказалі – на Дубко, 5. Яны яго абшукалі, абшукалі заплечнік, пасадзілі ў бус і павезлі.

Затрыманага актывіста павезлі ў РАУС Ленінскага раёна Горадна. Сяргей Верамеенка, як і затрыманы сёння раніцай намеснік старшыні Партыі БНФ Вадзім Саранчукоў, удзельнічаў 15 снежня ў Гродне ланцугу за незалежнасць на мосце.