Суд па справе Бабарыкі пачнецца 17 лютага

Грамадства

Вярхоўны суд прызначыў дату пачатку асноўнага разбору па так званай «справе Белгазпрамбанка» ці па «справе Бабарыкі». Сёння адбылося папярэдняе пасяджэнне.

b_3.jpg


Асноўны разгляд прызначаны на 17 лютага, паведамляе REFORM.by са спасылкай на БелТА. Сёння ў судзе разглядалася выкананне пагаднення з шасцю абвінавачанымі па гэтай справе.

Віктару Бабарыка, які вылучыўся кандыдатам у прэзідэнты і сабраў найбольшую колькасць подпісаў у сваю падтрымку сярод незалежных кандыдатаў, прад’яўленае абвінавачванне па ч. 3 арт. 430 ч. 2 арт. 235 КК аб атрыманні хабару арганізаванай групай у асабліва буйным памеры, а таксама аб легалізацыі («адмыванні») сродкаў, атрыманых злачынным шляхам, у асабліва буйным памеры адпаведна. У КДБ яго назвалі арганізатарам злачыннай дзейнасці. Віктар Бабарыка не прызнаў сваю віну.

Намеснікам старшыні праўлення «Белгазпрамбанка» Сяргею Шабану, Аляксандру Ільясюку, Кірылу Бадзею, Дзмітрыю Кузьмічу, а таксама былым першаму намесніку старшыні праўлення Аляксею Задойку і намесніку старшыні праўлення Сяргею Дабралёту абвінавачванне прад'яўлена па ч. 3 арт. 430 КК. Яны абвінавачваюцца ў атрыманні хабару.

Акрамя таго, дырэктар ТАА «Активлизинг» Віктар Кабяк абвінавачваецца па ч. 2 арт. 431 КК Рэспублікі Беларусь (дача хабару ў буйным памеры). У Генпракуратуры сёння назвалі памер хабару: не менш за 2,476 млн долараў.

Віктару Бабарыку таксама закідаюць здзяйсненне фінансавых аперацый для надання правамернасці валодання сродкамі, загадзя атрыманымі злачынным шляхам. Гаворка ідзе аб набыцці размешчаных у Мінску двух капітальных пабудоў на суму 1 млн рублёў і іншай маёмасці.

Па інфармацыі Генпракуратуры, праверка датычнасьці службовых асоб ААТ «Белгазпрамбанк» да карупцыйных злачынстваў была пачата ў 2018 годзе. Раскрыццю злачынных фінансавых аперацый сярод іншага спрыяла атрыманне звестак з Рэспублікі Кіпр у адказ на просьбу аб аказанні прававой дапамогі па крымінальнай справе.

Аднак усім відавочна, што «справа Белгазпромбанку» — палітычна матываваная. Бабарыку арыштавалі ў час падачы подпісаў на рэгістрацыю кандыдатам у прэзідэнты.