Навіны ад Алеся Бяляцкага з горацкай калоніі: вярнулі з ПКТ у атрад, не перадаюць лекі
Неўзабаве — 14 ліпеня — будзе тры гады, як за кратамі ўтрымліваецца заснавальнік і старшыня Праваабарончага цэнтра «Вясна» Алесь Бяляцкі. За гэты час у Беларусі за праваабарончую дзейнасць яго асудзілі да 10 гадоў зняволення, а ў свеце яго ўклад у абарону правоў чалавека адзначылі Нобелеўскай прэміяй міру, нагадваюць праваабаронцы.
З траўня мінулага году Алесь Бяляцкі адбывае свой тэрмін у горацкай калоніі № 9, дзе сутыкаецца з ціскам. «Радыё Свабода» дазналася падрабязнасці пра ўмовы ўтрымання праваабаронцы.
Паводле крыніцы Свабоды, у красавіку-траўні Алеся Бяляцкага вярнулі з памяшкання камернага тыпу (ПКТ) горацкай калоніі ў атрад, але адміністрацыя калоніі па-ранейшаму ставіцца да палітвязня звышпільна. У ПКТ ён утрымліваўся з пачатку лістапада 2023 года.
«Ведаем, што ён зноў ходзіць на працу, на дрэваапрацоўку. Бывае, што на яго накладаюць спагнанні, пазбавілі перадач, бываюць і больш сур’ёзныя пакаранні — неяк сядзеў у ШІЗА. Увага да яго пасля вяртання з ПКТ не стала слабейшай», — паведаміла крыніца.
Глядзіце таксама
Паводле крыніцы «Радыё Свабоды», Алесь Бяляцкі не атрымлівае карэспандэнцыі ад сваякоў і сяброў. Апроч гэтага, ніводнага разу ў палітвязня не было відэазванкоў са сваякамі. Толькі зрэдку на волі ад яго атрымліваюць лісты і паштоўкі. Пра стан здароўя Алеся Бяляцкага новай інфармацыі няма.
«Вядома, што ў выніку былой адседкі ў бабруйскай калоніі праблемы са здароўем узніклі і працягваюцца. Як ён іх вырашае, невядома. Але нібыта ў лякарню не трапляў. Дакладна вядома, што яму немагчыма перадаць лекі, значыць, застаецца спадзявацца толькі на тое, што можа атрымаць у медычнай частцы калоніі», — распавяла крыніца.
Пра псіхалагічны стан палітвязня вядома, што ён захоўвае роўны, нармальны настрой, стрыманы ў выказваннях, ацэнкі дае рэалістычныя, паведаміла пра Алеся Бяляцкага крыніца, якая кантактавала з абазнанымі ў справах палітвязня людзьмі.
Глядзіце таксама
Тым часам, 2 ліпеня адбудзецца адкрыццё выставы прысвечанай двум палітзняволеным выбітным праваабаронцам, вязняў сумлення і лаўрэатаў Нобелеўскай прэміі міру Алесю Бяляцкаму і Алегу Арлову ў Парыжы. Яе арганізавалі «Маланка-Медыя», Праваабарончы цэнтр «Вясна», Russia-Libertés, Espace Libertés/Reforum Space Paris пры падтрымцы Еўрапейскай камісіі.
Выстава «Я не баюся. Няхай яны баяцца!» перад гэтым адкрылася ў Берліне, дзе яна будзе дэманстравацца да 5 ліпеня.
Глядзіце таксама
Алесь Бяляцкі — беларускі праваабаронца, заснавальнік і кіраўнік праваабарончага цэнтру «Вясна», асуджаны ў 2023 годзе на 10 гадоў турмы за сваю праваабарончую дзейнасць, лаўрэат Нобелеўскай прэміі міру.
Даўні сябар Алеся Бяляцкага Алег Арлоў не менш выбітная фігура ў галіне правоў чалавека ў Расіі, адзін з заснавальнікаў Цэнтру абароны правоў чалавека «Мемориал», — арганізацыі, якая таксама стала лаўрэатам Нобелеўскай прэміі міру ў 2022 годзе. Нядаўна Арлова асудзілі на 2,5 года зняволення за выказванні супраць вайны ва Украіне.