Наталля Папкова звярнулася ў СК з нагоды змяшчэння ў псіхбальніцу
Актывістка «Маладой Беларусі» Наталля Папкова накіравала заяву ў Брэсцкі міжраённы аддзел Следчага камітэту аб здзейсненым злачынстве ў адносінах да яе — незаконным змяшчэнні ў псіхіятрычную бальніцу.
Наталля Папкова.
У заяве актывістка
ўказвае, што раніцай 3 сакавіка, калі яна з сястрой выходзіла з дому, яе затрымалі супрацоўнікі
міліцыі, якія адвезлі спачатку ў псіханеўралагічны дыспансер, потым у
пракуратуру, а пасля — зноў даставілі ў дыспансер.
У выходныя ніякіх лекаў Наталлі Папковай не давалі, абследаванняў не праводзілі.
“У панядзелак мяне выклікаў галоўны ўрач бальніцы, які сказаў, што я павінна прайсці абследаванне па санкцыі пракурора, а калі я добраахвотна гэтага не зраблю, то яны мяне не адпусцяць.
Я прайшла даследаванне, мне зрабілі энцэфалаграму галавы ды правялі псіхіятрычныя тэсты, а потым адпусцілі”, — распавяла актывістка.
Са словаў дактароў Наталлі Папковай стала зразумела, што падставай для прымусовай шпіталізацыі стала заява нейкага грамадзяніна пра тое, што ў яе ёсць псіхіятрычнае захворванне і яна сваімі дзеяннямі можа нанесці шкоду свайму здароўю — учыніць суіцыд. Аднак, праведзенае абследаванне гэтага не пацвердзіла.
“Я лічу, што маё затрыманне, далейшае дастаўленне і ўтрыманне ў псіхіятрычным шпіталі з'яўляецца нічым іншым, як незаконным і адвольным затрыманнем, з мэтай недапушчэння майго ўдзелу ў мірнай дэманстрацыі пратэсту супраць прымянення Дэкрэта прэзідэнта Рэспублікі Беларусь № 3, якая адбылася ў г. Брэсце 5 сакавіка.
Дадзенымі заведама незаконнымі дзеяннямі службовых асобаў была нанесена істотная шкода маім законным правам, нанесены маральны ўрон”, — адзначае актывістка ў сваё заяве да Следчага камітэта.
Яна просіць правесці праверку на прадмет наяўнасці складу злачынства ў дзеяннях службовых асоб i iншых грамадзянаў, якія маюць дачыненне да незаконнага накіравання і змяшчэння яе ў псіхіятрычную бальніцу.
“Варта адзначыць, што дзеючым крымінальным кодэксам Рэспублікі Беларусь прадугледжана крымінальная адказнасць за незаконнае змяшчэнне грамадзяніна ў псіхіятрычную бальніцу, а таксама адказнасць за падачу заведама фальшывай заявы, якая стала падставай для прымусовай шпіталізацыі”, — падкрэслівае юрыст Праваабарончага цэнтра “Вясна” Валянцін Стэфановіч, які дапамагаў Наталлі Папковай у складанні дакумента.