На БелАЭС не ажыццяўляецца належны кантроль за выкананнем мер бяспекі

У 2018 годзе пры будаўніцтве Беларускай АЭС загінуў адзін працоўны, трое было цяжка траўмавана. Усяго было выяўлена звыш 1,2 тысячы парушэнняў заканадаўства аб ахове працы.

Пра гэта Naviny.by распавялі ў Гродзенскім абласным упраўленні Дэпартамента дзяржаўнай інспекцыі працы Міністэрства працы і сацыяльнай абароны.
Гэтае ведамства штотыдзень кантралюе выкананне мер бяспекі пры выкананні будаўнічых, будаўніча-мантажных, рамонтных і іншых работ на аб'ектах атамнай станцыі, так як там працуе шмат падрадных арганізацый.
Кантроль ажыццяўляецца па асобным указе кіраўніка краіны, які прадугледжвае спрошчаную працэдуру. Акт праверкі не складаецца, а адразу выдаецца прадпісанне.
У мінулым годзе на аб'ектах Беларускай АЭС дэпартаментам праведзена 203 праверкі. Па іх выніках выявілі больш за 1,2 тысячы парушэнняў заканадаўства аб ахове працы і прыцягнута да адміністрацыйнай адказнасці ў выглядзе штрафу 117 упаўнаважаных службовых асоб.
«Парушэнні розныя. У будаўніцтве характэрна тое, што як з боку службовых асоб наймальніка, так і з боку грамадскіх інспектараў першасных прафсаюзных арганізацыяў не ажыццяўляецца належны кантроль за выкананнем мер бяспекі на працоўных месцах. Гэта праца на вышыні на адлегласці бліжэй за два метры ад перападу вышынь. Гэта неабгароджаныя перапады вышынь, лесвічных маршаў, праёмаў. Гэта праца без прымянення ахоўных паясоў. Гэта няправільнае складаванне матэрыялаў. Ёсць таксама недахопы па эксплуатацыі абсталявання: змяшальнікаў, тынкавых машын», — распавялі ў Гродзенскім абласным упраўленні Дэпартамента.
Па звестках ведамства, у мінулым годзе пры будаўніцтве АЭС загінуў адзін рабочы. Гэта супрацоўнік прадстаўніцтва расійскага АТ «Сезам» у Беларусі. Прычына — нездавальняючае ўтрыманне працоўных месцаў, якое выказалася ў ненадзейным закрыцці тэхналагічнага праёму драўлянымі шчытамі і адсутнасці ўстойлівай трывалай агароджы.
Трое рабочых былі цяжка траўмаваны. У першым выпадку пацярпеў электразваршчык ААТ "Гомельтэхмантаж". Ён не выкарыстоўваў ахоўны пояс і ахоўную каску. Акрамя таго, кіраўнік прац дапусціў да эксплуатацыі будаўнічую вышку без яе прыёмкі перад пачаткам работ.
У другім выпадку пацярпеў электраманцёр прадстаўніцтва расійскай інжынірынгавай кампаніі «АСЭ» ў Беларусі з прычыны парушэнняў мер электрабяспекі з боку наймальніка.
У трэцім выпадку з-за асабістай неасцярожнасці пацярпеў начальнік участка магілёўскага ТДА «Брандстройпроект». У падлозе была ненадзейна закрытая адтуліна, у якую ён праваліўся.
«Калі пачыналася будоўля, мы думалі, што там будзе шмат праблем па бяспецы, чакалі сур'ёзны ўсплёск траўматызму, але гэтага няма. Гэта дзякуючы і асобным указам прэзідэнта, і каардынацыі. Зараз там асноўныя працы завяршыліся, таму будзе ўзнікаць менш небяспечных сітуацый», — адзначылі ў Гродзенскім абласным упраўленні Дэпартамента.
У ведамстве лічаць, што трэба развіваць і прывіваць у работнікаў пачуццё адказнасці за ўласную бяспеку.
Усяго ў мінулым годзе ў Беларусі ў выніку няшчасных выпадкаў на вытворчасці загінулі 144 работніка і 700 чалавек атрымалі цяжкія вытворчыя траўмы. У Гродзенскай вобласці — самыя нізкія паказчыкі па краіне.
Паводле naviny.by