«Могуць і паслаць»: у райцэнтрах настаўнікаў прымушаюць патруляваць вуліцы

Настаўнікі з райцэнтраў у Мінскай вобласці вечарамі патрулююць вуліцы. Напрыклад, у Крупках «настаўніцкі дазор» — кожную пятніцу і суботу з 21:00 да 23:00. А калі не выйсці на «маршрут», дык могуць і прэміі пазбавіць, і ўвогуле звольніць з працы.

«Што тут такога?»

«Звычайна ходзім удваіх, — расказвае Еўрарадыё настаўніца з Крупак. — Мы павінны сачыць за падлеткамі, каб не пілі спіртное. Рознае бывае, могуць і груба адказаць, і паслаць. Ці ўвогуле не адрэагаваць. Калі гэта з нашай школы вучань, дык звычайна падыходзім і просім разысціся, каб не забралі ў міліцыю. Адміністрацыя кажа, што школе не патрэбныя пратаколы, таму па магчымасці трэба вырашаць усё на месцы, мірна».
Афіцыйна настаўніцкі патруль — гэта распараджэнне аддзела адукацыі Крупскага райвыканкама. Чыноўнікі рукамі, а дакладней, нагамі педагогаў праводзяць прафілактыку ўжывання алкаголю і правапарушэнняў сярод падлеткаў.
«Гэта настаўніцка-бацькоўскі патруль, — расказвае Еўрарадыё намеснік начальніка ўпраўлення адукацыі, спорту і турызму Крупскага райвыканкама Уладзімір Ахрамчук. — Вечарамі працуюць гурткі, секцыі, факультатывы. А недзе, можа, дзеці і не дагледжаныя. Таму ходзім, правяраем, дзе яны збіраюцца. Дом культуры, дыскатэкі. Што тут такога? Гэта нармальная форма ў рэспубліцы».
У іншых райцэнтрах Мінскай вобласці нам адказваюць, што «настаўніцкія дазоры» існуюць і ў іх. Але пацвярджэнняў, што да такой практыкі дайшло ў іншых абласцях Беларусі, у нас знайсці не атрымалася.

Пераходзяць на іншую вуліцу і працягваюць піць

Па інструкцыі настаўнікі, якія злавілі п’яных падлеткаў, мусяць выклікаць міліцыю і бацькоў. Наша суразмоўніца расказвае, што гэтага ніхто не робіць, праблемы і далейшыя разборы нікому не патрэбныя: «Мы прапаноўваем школьнікам ісці дамоў. Тыя пагаджаюцца, але проста пераходзяць на іншую вуліцу і працягваюць піць».
«Калі падчас майго патруля міліцыя затрымала падлетка за распіццё ці яшчэ за нешта, адказваць усё роўна буду я, — крыўдуе настаўніца. — Нават калі ў той момант была на іншай вуліцы ці ў іншым мікрараёне. Афіцыйна яшчэ і бацькі павінны разам з настаўнікамі хадзіць, але яны гэтага не робяць. І паўплываць я не магу на іх. З настаўнікамі з іншых абласцей размаўляла, дык яны не чулі пра такое».
Дырэктар крупскай раённай гімназіі Ірына Шамашова расказвае Еўрарадыё, што патруль з настаўнікаў працуе ўжо шмат гадоў. Яна нават згодная, каб наш карэспандэнт паўдзельнічаў у такім патрулі разам з настаўнікамі. Але — толькі з дазволу райвыканкама.
Дырэктар школы № 3 Алена Баранчук размаўляць пра настаўніцкія патрулі адмаўляецца: «Калі вам цікава, дык паспрабуйце ў іншай школе. А то будзеце потым па ўсёй Еўропе расказваць, а нам гэта не трэба».

За кошт настаўнікаў

Маршрут настаўнікаў не абмяжоўваецца горадам. Патруляваць даводзіцца і суседнія аграгарадкі. Педагогі мусяць дабірацца туды і адтуль самастойна. «Настаўніцкая дазор» заканчваецца пазней, чым адыходзяць апошнія прыгарадныя аўтобусы, таму вяртацца даводзіцца на таксі — за свой кошт.
Сур’ёзных канфліктаў з падлеткамі жанчына не памятае, але кажа, што сэнсу ў іх хаджэнні па вуліцах няма. Акрамя таго што патруляваць вуліцы трэба ў пятніцу і суботу, сачыць за парадкам даводзіцца і ў святы. На Новы год настаўнікі патрулююць горад да раніцы.