Мінскі абласны суд пакінуў у сіле рашэнне аб прызыве ў войска Паўла Сяргея
Судовая калегія спасылаецца на тое, што ў Беларусі адсутнічае заканадаўчы парадак праходжання альтэрнатыўнай грамадзянскай службы, а таксама неабгрунтаваныя довады прызаўніка пра тое, што служыць у войску яму не дазваляюць рэлігійныя перакананні.
Павел Сяргей
Павел Сяргей — актывіст "Маладога фронту", які быў выключаны з Маладзечанскага палітэхнічнага каледжа пасля адсідкі на Акрэсціна. Летась яму пачалі прыходзіць позвы з ваенкамата, куды ён накіраваў заяву на альтэрнатыўную грамадзянскую службу, паколькі не можа "па сваіх рэлігійных перакананнях насіць вайсковую форму і служыць у войску сярод камуністычнай сімволікі (серпа і молата), пад якой у СССР пераследавалі хрысціянаў". Аднак адмыслова створаная камісія пры ваенкамаце палічыла неабгрунтаваным патрабаванне прызаўніка, таму ў праходжанні АГС яму адмовілі.
Хлапец звярнуўся ў Маладзечанскі раённы суд, але там дзеянні вайскоўцаў палічылі законнымі. 28 лютага была разгледжана касацыяйная скарга Паўла Сяргея на рашэнне райсуда, але Мінаблсуд таксама адмовіў ухваліць скаргу актывіста. У заключэнні, падпісаным старшынёй Мінскага абласнога суда У.П. Крайко, адзначаецца, што ў Беларусі адсутнічае заканадаўчы парадак праходжання альтэрнатыўнай грамадзянскай службы. Аргументы Паўла Сяргея, што ён не можа служыць у войску па рэлігійных матывах, прызнаныя неабгрунтаванымі, паколькі аспрэчваюцца паказаннямі пастара царквы хрысціянскай веры евангелістаў, да якой належыць заяўнік.
Зараз Павал Сяргей служыць у пуцявым батальёне ў Слуцку.
Нагадаем, што права на праходжанне АГС замацавана ў Канстытуцыі Рэспублікі Беларусь яшчэ ў 1994 годзе. Аднак за гэты час так і не быў створаны адмысловы закон, які б рэгуляваў гэтыя
працэсы. Магчыма, дэпутаты прымуць яго сёлета, адпаведная норма зафіксавана ў Плане законапраектаў на 2013 год.