Мінкульт: Святлана Алексіевіч «не дарасла» да Героя Беларусі

Міністэрства культуры Беларусі разгледзела калектыўны зварот грамадзянаў з просьбай аб прысваенні Нобелеўскаму лаўрэату Святлане Алексіевіч звання Героя Беларусі.



Адказ ведамства размясціў у сваім акаўнце ў сацыяльнай сетцы «Фэйсбук» адзін з 334 чалавек, якія падпісаліся пад зваротам, Уладзімір Сташкевіч. Дакумент падпісаны намеснікам міністра Васілём Чэрнікам.

«У адпаведнасці з артыкулам 5 Закона аб дзяржаўных узнагародах званне «Герой Беларусi» з’яўляецца вышэйшай ступенню адзнакі Рэспублікі Беларусь і прысвойваецца за выключныя заслугі перад дзяржавай і грамадствам, звязаныя з подзвігам, здзейсненым у імя свабоды, незалежнасці і квітнення Рэспублікі Беларусь. У сувязі з выкладзеным Святлана Алексіевіч у цяперашні час не можа быць прадстаўлена да прысваення звання «Герой Беларусi», — гаворыцца ў дакуменце.

Уладзімір Сташкевіч нагадвае, што званне «Герой Беларусi» з’яўляецца вышэйшай ступенню адзнакі краіны і прысвойваецца за выключныя заслугі перад дзяржавай і грамадствам, звязаныя з подзвігам, здзейсненым у імя свабоды, незалежнасці і квітнення Рэспублікі Беларусь.

«Думаю, можна напісаць цікавы матэрыял з аналізам таго, хто ж тыя 11 Герояў Беларусі і за якія подзвігі яны былі прадстаўлены да ўзнагароды. Самая гераічная сфера ў нас, безумоўна, сельская гаспадарка. Але даюць і за жывапіс, спорт і нават рэлігію, так чым жа літаратура горш?» — пытаецца ён.

Спіс «Герояў Беларусі» зараз складаецца з 11 асобаў. Гэта:

лётчык Уладзімір Карват (пасмяротна), які цаной свайго жыцця адвёў падаючы самалёт ад двух вёсак.

Павел Марыеў, гендырэктар «БелАЗа»,

кіраўнік Гродзенсай вобласці Аляксандр Дубко;

Міхаіл Карчміт, кіраўнік агракамбіната «Сноў»;

Віталь Крэмка, старшыня калгасу «Кастрычнік» Гродзенскага раёна;

Міхаіл Высоцкі, генеральны дырэктар Навукова-інжынернага рэспубліканскага унітарнага прадпрыемства «Белаўтатрактарабудаванне» Нацыянальнай акадэміі навук Беларусі;

«айцец дэвальвацый» Пётр Пракаповіч;

Васіль Равяка, Кіраўнік сельскагаспадарчага вытворчага кааператыва «Прагрэс — Верцялішкі»;

Міхаіл Савіцкі, кіраўнік дзяржаўнай установы культуры «Творчыя акадэмічныя майстэрні жывапісу, графікі і скульптуры»;

Мітрапаліт Філарэт (Вахрамееў), Мітрапаліт Мінскі і Слуцкі, Ганаровы Патрыяршы Экзарх усяе Беларусі;

Дар'я Домрачава, алімпійская чэмпіёнка.

Можа, сапраўды, не трэба Алексіевіч у гэтую кампанію?