Літоўскія мытнікі знайшлі кантрабандныя беларускія цыгарэты ў колах і баку

11 снежня літоўскія мытнікі перахапілі партыю беларускіх цыгарэт у пункце пропуску «Твярачус».

Пры праходжанні мытнага кантролю кіроўца грузавога аўтамабіля Man заявіў, што рушыць парожнім у Польшчу транзітам праз Літву. Мытнікі зазірнулі ў паліўны бак і ўбачылі, што ўнутры знаходзяцца цыгарэты. Яны выказалі здагадку, што схованкі могуць быць абсталяваны і ў іншых месцах аўтамабіля.

Для дэмантажу машыны запрасілі ігналінскіх пажарных. Кантрабандныя цыгарэты выявілі яшчэ ў запасных колах, баку для астуджэння рухавіка і ў падлозе паўпрычэпа.

Усяго было канфіскавана 50 тысяч пачкаў цыгарэт ТЯ Gold і Minsk Capital QS коштам каля 175 тысяч еўра, паведамляе літоўская мытня.

Кіроўцу, грамадзяніна Беларусі, затрымалі на два дні, а затым вызвалілі пад заклад. Вядзецца расследаванне.

Паводле reform.by.