Хронікі рэпрэсій за 28 лістапада: Масавыя ператрусы па справе Каардынацыйнай Рады
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць «экстрэмісцкімі» матэрыяламі і фармаваннямі, паведамляюць праваабаронцы.
У Мінску праходзяць масавыя ператрусы па «справе выбараў у Каардынацыйную Раду»
Раніцай 28 лістапада з’явілася інфармацыя пра масавыя ператрусы ў Мінску. Пра пераслед людзей, звязаных з Каардынацыйнай Радай, паведамляюць і праўладныя тэлеграм-каналы — яны назвалі гэта «папярэднім этапам падрыхтоўкі да выбараў у "Каардынацыйную Раду"».
Пастановы на ператрус выдадзеныя паводле шасці артыкулаў Крымінальнага кодэксу:
- здрада дзяржаве (арт. 356 КК);
- змова або іншыя дзеянні з мэтай захопу дзяржаўнай улады (арт. 357 КК);
- заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь (арт. 361 КК);
- стварэнне экстрэмісцкага фармавання альбо ўдзел у ім (арт. 361-1);
- фінансаванне экстрэмісцкай дзейнасці (арт. 361-2 КК);
- садзейнічанне экстрэмісцкай дзейнасці (арт. 361-4 КК).
Пазней Следчы камітэт Беларусі заявіў, што ў якасці падазраваных па "справе выбараў у Каардынацыйную Раду" прыцягнутыя звыш ста асоб.
Па стане на 14 гадзін вядома, што ў "справе выбараў у Каардынацыйную Раду" падазраваныя наступныя сябры КР:
- Павел Латушка;
- Сяргей Чалы;
- Юрась Губарэвіч;
- Артур Фінькевіч;
- Міхаіл Таўбе;
- Ганна Красуліна;
- Раман Кісляк.
Па месцах іх ранейшага жыхарства ці рэгістрацыі ў Беларусі прайшлі ператрусы.
Санкцыю на ператрусы па «справе выбараў у Каардынацыйную Раду» падпісаў генпракурор Андрэй Швед. Таксама на маёмасць людзей, якія праходзяць па гэтай справе, паводле праваабаронцаў, накладваецца арышт.
Глядзіце таксама
Следчы камітэт: У якасці падазраваных па «справе КР» прыцягнутыя звыш ста асоб
У прапагандыскай манеры ведамства піша, што «зайграўшыся ў пабудову сваёй дзяржавы па «заходніх лекалах», «беглыя» на чале з самаабвешчаным лідарам пазіцыянуюць сябе альтэрнатыўнымі органамі ўлады, праводзяць выбары, распрацоўваюць пашпарты, узнагароды і іншае.
У прыватнасці, «Офіс Ціханоўскай» яны прыраўнялі да адміністрацыі прэзідэнта, «Каардынацыйную Раду» да протапарламента, а «Аб'яднаны Пераходны Кабінет» да ўрада».
СК сцвярджае, што спіс сябраў КР нібыта прадставіў чалавек, які вярнуўся ў Беларусь праз камісію па вяртанні.
Улады хочуць канфіскаваць маёмасць падазрваных па "справе выбараў у Каардынацыйную Раду".
Пра гэта паведамляе Следчы камітэт.
«Устанаўліваецца наяўнасць у падазраваных маёмасці і нерухомасці на тэрыторыі нашай краіны з мэтай наступнага накладання арышту. З улікам атрыманых доказаў будзе разгледжана пытанне аб запуску працэдуры спецыяльнай вытворчасці для забеспячэння прынцыпу непазбежнасці пакарання і кампенсацыі шкоды, прычыненай злачыннымі дзеяннямі».
- Ператрус адбыўся дома ў Паўла Латушкі і іншых членаў каманды НАУ
Сёння да родных многіх супрацоўнікаў каманды Народнага антыкрызіснага ўпраўлення, а таксама ў кватэры, дзе яны раней пражывалі, прыйшлі з вобшукам супрацоўнікі беларускіх спецслужбаў.
Па звестках @latushka, гэта адбываецца адначасова, масава і датычыцца прадстаўнікоў многіх дэмакратычных сілаў Беларусі. З вобшукам прыйшлі і да дому Паўла Латушкі.
- ГУБАЗіК правёў ператрус у аналітыка і сябра КР Сяргея Чалага
Фотаздымкі ператрусу апублікавалі праўладныя тэлеграм-каналы.
- Сілавікі прыходзілі па месцы прапіскі кіраўніка руху «За свабоду» Юрася Губарэвіча
Пра гэта палітык напісаў у сваім Facebook.
"Дзіўныя людзі прыходзілі шукаць маю маёмасць па месцы прапіскі. Ведаючы бандыцкую сутнасць гэтага рэжыму, усё распрадаў яшчэ да канца 2021 года".
- Ператрус таксама адбываецца ў Артура Фінькевіча
З вобшукам прыходзілі таксама да Артура Фінькевіча. Колішні лідар "Маладога фронту" паведаміў, што на яго завялі некалькі крымінальных спраў, паведамляе "Еўрарадыё".
"Мяне ў Беларусі няма 3 гады, не жыў па месцы рэгістрацыі каля 9 гадоў, ні рэчаў, ні маёмасці ў Беларусі не маю", — піша Артур Фінькевіч на сваёй старонцы ў Фэйсбуку.
Сёння ў Беларусі праходзяць масавыя вобшукі па былых адрасах сяброў Каардынацайнай Рады і НАУ — па ўсім, каб сарваць выбарчую кампанію ў КР, якая нават не пачыналася.
Глядзіце таксама
- Ператрус у аднаго з прадстаўнікоў Народных амбасадаў Беларусі
Ператрус таксама адбыўся ў аднаго з прадстаўнікоў Народных амбасадаў Беларусі і дэлегата КС ад суполкі "Беларусы Замежжа" Міхаіла Таўбэ.
“Сёння па маёй прапісцы ў Мінску прыйшлі з ператрусам”, — паведаміў ён.
- Ператрус сёння адбыўся і ў праваабаронцы Рамана Кісляка
Працягваўся ён некалькі гадзін.
- ГУБАЗіК апублікаваў фотаздымкі з ператрусу ў прэс-сакратаркі Ціханоўскай Ганны Красулінай
«Мировые Конфликты» і «Бомжи в Париже» — чарговае папаўненне Спісу экстрэмісцкіх матэрыялаў
У яго трапілі:
- Telegram-каналы і чаты «Мировые Конфликты», «Говорит Беларусь», «Бомжи в Париже», «Беларусь Без Цензуры»;
- Instagram-старонка «belarus2belarus»;
- Facebook-старонкі «Усё аб Дуброўна», «Цэнтр Беларускай Салiдарнасцi/Centrum Bialoruskiej Solidarnosci»;
- Інфармацыйная прадукцыя, размешчаная на старонцы ў «Беларусь. Всё обо всём» у «Аднакласніках» [у спісе Мінінфарма спасылка не працуе];
- TikTok-старонкі «_Prosto_Belarus_», «Klim Zlobich».
Пенсіянеры і адвакатка — яшчэ 8 беларусаў унеслі ў «Спіс тэрарыстаў»
Камітэт дзяржаўнай бяспекі абнавіў спіс «асоб, якія маюць дачыненне да тэрарыстычнай дзейнасці» — там з'явіліся прозвішчы яшчэ васьмі чалавек.
Сярод іх асуджаная да 12 гадоў калоніі Яна Пінчук, 68-гадовая пенсіянерка Наталля Пятровіч, адвакатка Анастасія Лазарэнка, 69-гадовы пенсінер Барыс Вітко, Андрэй Ігнатовіч, Андрэй Лаўрыновіч, 65-гадовы пенсіянер Пётр Старацітараў, а таксама Віктар Жаваранак.
Цяпер у «тэрарыстычным спісе» 1138 чалавек, з іх 383 — беларусы (адзначым, што ў спісе КДБ 1147 пазіцый, аднак 9 чалавек з яго былі выдаленыя раней).
Глядзіце таксама
Затрыманы віцебскі пастар Іван Вялічка
Абставіны затрымання пастара Царквы хрысціян поўнага евангелля невядомыя, піша "Хрысціянская візія".
У Вярхоўным судзе разгледзелі апеляцыю на прысуд Эдуарду Бабарыку
Эдуарда Бабарыку прызналі вінаватым паводле ч. 3 арт. 130 (распальванне іншай сацыяльнай варожасці), п. 6 арт. 16 і ч. 1 арт. 342 (пасобніцтва ў арганізацыі дзеянняў, якія груба парушаюць грамадскі парадак) і ч. 2 арт. 243 (ухіленні ад выплаты падаткаў) КК.
Эдуард Бабарыка на на агалошванні прысуду 5 ліпеня 2023 года
Нагадаем, Мінскі абласны суд 5 ліпеня вынес прысуд па справе Эдуарда Бабарыкі — 8 гадоў калоніі ва ўмовах узмоцнега рэжыму. Пры гэтым у тэрмін не залічылі час утрымання ў СІЗА КДБ да 14 снежня 2021 года па першапачатковаму абвінавачванню.
Як паведамляе тэлеграм-канал Вярхоўнага суда, прысуд пакінуты без зменаў, а апеляцыйная скарга без задавальнення.
Глядзіце таксама
Баранавіцкі праваабаронца Аляксандр Вайцешык не выйшаў на волю пасля 15 сутак арышту
Па інфармацыі брэсцкіх праваабаронцаў, Аляксандр застаецца ў ізалятары.
Праваабаронцу затрымалі 9 лістапада і арыштавалі на 15 сутак — яго мусілі вызваліць 24 лістапада, але гэтага не адбылося. Не вызвалілі Вайцешыка і 27 лістапада (то бок калі б яго "перазатрымалі" на 72 гадзіны).
На якой падставе Аляксандра застаецца затрыманым, праваабаронцам на гэты момант невядома.
Сярод затрыманых на Гомельшчыне – вядомы актывіст і звычайныя рабочыя
Аднога з рабочых завуць Мельнічэнка Павел. Ён працуе на Мазырскім нафтаперапрацоўчым заводзе. Мужчыну затрымалі за ўдзел у пратэстах у 2020 годзе і знялі «пакаяннае» відэа, прымусіўшы стаць нагамі на бел-чырвона-белы сцяг, піша "Гомельская Вясна".
Калегу Паўла, таксама супрацоўніка НПЗ Лапіцкага Андрэя затрымалі за падпіскі на «экстрэмісцкія» каналы. На «пакаянным» відэа мужчына прызнаўся, што сапраўды быў падпісаны і паабяцаў «усё павыдаляць».
Акрамя іншага «сілавікі» змусілі затрыманых назваць суму, якую складае іх заробак. Як далей склаўся лёс затрыманых – невядома, праваабаронцы толькі валодаюць інфармацыяй, што адзін з мужчын трапіў у ІЧУ.
Былога відэааператара Андрэя Толчына вінавацяць у экстрэмізме
Крымінальную справу супраць палітзняволенага былога відэааператара-фрылансера Андрэя Толчына следчыя перадалі ў пракуратуру для вывучэння і накіравання ў суд.
Як стала вядома, гомельскага журналіста вінавацяць не ў нанясенні шкоды нацыянальнай бяспецы, як меркавалася раней, а ў экстрэмізме паводле артыкула 361-1 Крымінальнага кодэкса РБ. Гэта – «Стварэнне экстрэмісцкага фармавання альбо ўдзел у ім».
Што канкрэтна ставіцца ў віну Андрэю Толчыну, дагэтуль невядома, паколькі абвінавачанне трымаецца ў таямніцы. У лістах на волю з прычыны турэмнай цэнзуры напісаць пра гэта адкрыта вязень не можа.