Эколагу Уладзіміру Валодзіну пагражаюць крымінальнай справай

Гісторыка-эколага Уладзіміра Валодзіна турбуюць званкамі супрацоўнікі Ленінскага РУУС.



Жанчына, якая прадставілася супрацоўніцай крымінальнага вышуку, патрабавала, каб актывіст з’явіўся на размову. Уладзімір Валодзін папрасіў, каб яму патлумачылі, паводле якой справы выклікаюць, і даслалі афіцыйную позву. Але на гэта ён пачуў пагрозу перавесці яго ў статус падазраванага або абвінавачанага.
Цягам 25 чэрвеня яму яшчэ не раз тэлефанавалі, а раніцай 26 чэрвеня супрацоўнікі РУУС ужо размаўлялі з маці актывіста. Ёй сказалі, што Уладзімір Валодзін падазраецца ў згвалтаванні, якое адбылося ў Варонежы. Гэтыя звесткі нічым не пацверджаныя, афіцыйная позва на допыт да гэтага часу не прыходзіла.
"У Беларусі акрамя распаўсюджаных формаў рэпрэсій такіх, як адміністрацыйны пераслед, часта ў дачыненні да актывістаў прыдумляюць надуманыя абвінавачванні, у тым ліку з удзелам аддзелаў крымінальнага вышуку", — кажа  юрыстка праваабарончага цэнтра "Вясна" Наста Лойка. — Абсурдныя абвінавачванні пры гэтым могуць гучаць абсалютна ва ўсякай форме. Але часцей за ўсё ўвага звязаная з жаданнем абмежаваць актывістаў перад грамадска-значнымі падзеямі. Нежаданне дасылаць позву Уладзіміру пацвярджае надуманасць падстаў для выкліку, таму цяпер ягоная сітуацыя выглядае як запалохванне. Нам ужо паступіла некалькі сігналаў ад футбольных фанатаў, што імі цікавіліся ў такой манеры перад 3 ліпеня".