Даклад беларускага спецдакладчыка ААН выклікаў скандал у Зімбабве

Алена Доўгань выпускала даклады пра ўплыў санкцый у рэжымах, якія супрацоўнічаюць з Мінскім. Журналіст-даследчык з Зімбабве падазрае яе ў жаданні выгарадзіць гэтыя рэжымы, піша Thinktanks.by.

Эммерсан Мнангагва падчас візіту ў Беларусь, 2019 год. Фота house.gov.by

Алена Доўгань выпускала даклады пра ўплыў санкцый у рэжымах, якія супрацоўнічаюць з Мінскім. Журналіст-расследвальнік з Зімбабве падазрае яе ў жаданні выгарадзіць гэтыя рэжымы.

На чарговы скандал, звязаны з Беларуссю і Зімбабве, звярнуў увагу гісторык Аляксандр Фрыдман.

Гаворка ідзе пра даклад беларускага спецдакладчыка ААН Алены Доўгань наконт Зімбабве.

Алена Доўгань з'яўляецца прафесарам кафедры дзяржаўнага кіравання БДУ, а таксама "спецыяльным дакладчыкам ААН па негатыўным уплыве аднабаковых прымусовых мер на правы чалавека".

У гэтай якасці спецдакладчыка яна наведала Зімбабве, а па выніках паездкі прадставіла даклад.

"Даклад у цэлым задаволіць аўтарытарны рэжым у Харарэ — ключавога партнёра Беларусі ў Афрыцы. Да гэтага Доўгань ужо выпускала аналагічныя даклады аб іншых саюзніках афіцыйнага Мінска — Катары, Сірыі і Венесуэле", — адзначыў Александр Фрыдман.

Зімбабвійскі журналіст-даследчык Хоўпвэл Чынона (Hopewell Chin'ono) прааналізаваў даклад Доўгань і выявіў там "самаплагіят": часткі з венесуэльскага дакладу скапіяваныя ў даклад зімбабвійскі. Журналіст апублікаваў фота абодвух дакладаў з паўтаральнымі часткамі.

Хоўпвел Чынона абвінавачвае беларускага спецдакладчыка ў імкненні выгарадзіць рэжым прэзідэнта Эмерсана Мнангагвы.

Алена Доўгань стала незалежным міжнародным экспертам СПЧ па негатыўным уплыве аднабаковых прымусовых мер на правы чалавека ў 2020 годзе. У сваёй першай заяве ў гэтым статусе яна заклікала зняць ці хаця б прыпыніць на час пандэміі COVID-19 уведзеныя ў дачыненні да шэрагу краін эканамічныя санкцыі.