Хрысціянскі спявак Патліс правядзе ў Гомелі творчы вечар

 Хрысціянскі спявак Аляксандр Патліс правядзе 25 верасня ў Гомелі творчы вечар, падчас якога выканае новыя і старыя песні і адкажа на пытанні публікі.



«Выканаю лепшыя песні з майго рэпертуару і некаторыя песні гурта «Новы Ерусалім», — распавёў у інтэрв’ю парталу Krynica.info музыка. — Сёе-тое спяю па заяўках публікі, я заўсёды да гэтага гатовы».

Па словах Аляксандра Патліса, гэта першая яго сустрэча ў такім фармаце ў Беларусі. Раней спявак сустракаўся з публікай толькі пасля вялікіх канцэртаў. У Гомелі ж гэта будзе спецыяльная сустрэча ў параўнальна невялікай аўдыторыі — кафэ можа змясціць толькі каля 90 чалавек. «Але такая камернасць прадугледжвае больш цесныя зносіны, я хачу паказаць маім гледачам некалькі рэчаў, якія яшчэ ў працы, некалькі фрагментаў новых песень, хачу параіцца, — паведаміў Патліс. — А размовы будуць, я думаю, пра творчасць, пра спорт, пра сям’ю, пра мае хрысціянскія перакананні, аб веры, аб жыцці «.

Удзельнікаў сустрэчы прапануюць каву, гарбату, печыва — і гэта, лічыць музыкант, дадасць творчай сустрэчы сяброўскага цяпла.

Паводле: krynica.info